ఆంధ్రప్రదేశ్‌లో కేంద్రం ఇచ్చిన నిధులతో జరిగిన డెవలప్‌మెంట్ అంతా తమ క్రెడిటేనని చంద్రబాబు చెప్పుకోవడం సిగ్గుచేటని అన్నారు బీజేపీ రాజ్యసభ ఎంపీ జీవీఎల్ సరసింహరావు. ఢిల్లీలో ఆయన మీడియాతో మాట్లాడుతూ.. చంద్రబాబు తన అసమర్థతను కప్పిపుచ్చుకునేందుకు ప్రధాని మోదీపై విమర్శలు చేస్తున్నారని మండిపడ్డారు. చంద్రబాబుకు మోదీ ఫోబియా పట్టుకుందన్నారు. రాష్ట్రం కోసం తామేదో చేసేస్తున్నామని ప్రజలను నమ్మించడానికే టీడీపీ ఎంపీలు లోక్‌సభలో డ్రామాలు ఆడుతున్నారని విమర్శించారు. గత ఎన్నికల్లో 600 హామీలు ఇచ్చిన చంద్రబాబు.. వాటిలో ఒక్కటైనా నెరవేర్చారో లేదో చెప్పాలని డిమాండ్ చేశారు. కేంద్రం అన్ని రాష్ట్రాల కంటే ఏపీకే ఎక్కువ నిధులిస్తోంది.. అయినా సరే కేంద్రం చిన్నచూపు చూస్తోందని టీడీపీ నేతలు విమర్శించడం సిగ్గుచేటని జీవీఎల్ మండిపడ్డారు. నరేగాలో వెస్ట్ బెంగాల్, తమిళనాడు కంటే ఏపీకే ఎక్కువ నిధులిచ్చిన విషయాన్ని అందరూ గుర్తించాలన్నారు. కూర్చున్న కొమ్మనే నరుక్కున్న చరిత్ర చంద్రబాబుది అని విమర్శించారు. టీడీపీ నేతలు రోజుకో స్క్రిప్టు రాసుకుని దాన్ని ఫాలో అవ్వడం తప్ప ప్రజలకు పనికొచ్చే పని ఒక్కటి కూడా చేయడం లేదన్నారు. వారిది ఆరాటమే తప్ప పోరాటం కాదన్నారు. దేశంలో ఎక్కువ అవినీతి ఏపీలోనే జరుగుతోందని, దాన్ని కప్పిపుచ్చుకునేందుకు చంద్రబాబు కేంద్రంపై నిందలు మోపుతున్నారని మండిపడ్డారు. అవినీతి, ప్రచార ఆర్భాటం తప్ప చంద్రబాబు సర్కారు ప్రజలకు చేసిందేమీ లేదని జీవీఎల్ ఆరోపించారు. నాలుగున్నరేళ్లలో హైకోర్టు కోసం రెండతస్తుల భవనం కూడా కట్టలేని చంద్రబాబు.. ప్రపంచస్థాయి రాజధానిని నిర్మిస్తాననడం సిల్లీగా ఉందని ఎద్దేవా  చేశారు.