ఆస్ట్రేలియా గడ్డపై 72 ఏళ్ల నుంచి అందని ద్రాక్షగా మిగిలిపోయిన టెస్టు సిరీస్‌ని ఎట్టకేలకి భారత్ జట్టు చేజిక్కించుకుంది. సిడ్నీ వేదికగా జరిగిన ఆఖరి టెస్టు మ్యాచ్‌ వర్షం కారణంగా ఈరోజు డ్రాగా ముగియగా.. నాలుగు టెస్టుల సిరీస్‌ని టీమిండియా 2-1తో కైవసం చేసుకుని సరికొత్త రికార్డు నెలకొల్పింది. 1947 నుంచి ఆస్ట్రేలియా పర్యటనకి 12 సార్లు వెళ్లిన భారత్ జట్టు.. అక్కడ టెస్టు సిరీస్‌ గెలవడం మాత్రం ఇదే తొలిసారి. కంగారూల గడ్డపై దశాబ్దాల టీమిండియా పర్యటనని ఓసారి పరిశీలిస్తే..! భారత్ జట్టు టెస్టు సిరీస్‌ గెలవడంలో మిడిలార్డర్ బ్యాట్స్‌మెన్ చతేశ్వర్ పుజారా క్రియాశీలక పాత్ర పోషించాడు. సిరీస్‌లో జరిగిన 4 టెస్టుల్లో ఏకంగా మూడు శతకాలు సాధించిన పుజారా.. ఏడు ఇన్నింగ్స్‌ల్లో కలిపి మొత్తం 521 పరుగులతో టాప్ స్కోరర్‌గా నిలిచాడు. అతనితో పాటు రిషబ్ పంత్ 350 పరుగులు, కెప్టెన్ విరాట్ కోహ్లీ 282 పరుగులతో ఆకట్టుకున్నారు. బౌలింగ్‌లోనూ భారత్ ఫాస్ట్ బౌలర్లు ఆసీస్ పేసర్ల కంటే మెరుగ్గా రాణించారు. జస్‌ప్రీత్ బుమ్రా 21 వికెట్లతో కెరీర్‌లో అత్యుత్తమ గణాంకాల్ని నమోదు చేయగా.. అతని తర్వాత మహ్మద్ షమీ 16, ఇషాంత్ శర్మ 11 వికెట్లతో మెరిశారు. అడిలైడ్‌ వేదికగా జరిగిన తొలి టెస్టులో 31 పరుగుల తేడాతో టీమిండియా విజయం సాధించగా.. ఆ తర్వాత పెర్త్ టెస్టులో 146 పరుగులతో ఆస్ట్రేలియా, మెల్‌బోర్న్ టెస్టులో 137 పరుగుల తేడాతో భారత్ గెలుపొందిన విషయం తెలిసిందే. కెప్టెన్ విరాట్ కోహ్లీ శతకం సాధించిన పెర్త్ టెస్టులో ఓడిపోయిన టీమిండియా.. పుజారా సెంచరీలు బాదిన అడిలైడ్, మెల్‌బోర్న్‌లో అలవోక విజయాల్ని అందుకుంది. తాజాగా సిడ్నీ టెస్టులోనూ చతేశ్వర్ పుజారా (193: 373 బంతుల్లో 22x4) శతకం సాధించగా.. డ్రాగా ముగించింది.