ఆంధ్రప్రదేశ్‌లో భారతీయ జనతా పార్టీకి ఊహించిన షాక్ తగిలింది. ఆ పార్టీ సీనియర్ నేత, ఎమ్మెల్యే బీజేపీకి సోమవారం రాజీనామా చేశారు. ప్రస్తుతం రాజమండ్రి అర్బన్ నియోజకవర్గానికి ప్రాతినిధ్యం వహిస్తోన్న ఎమ్మెల్యే ఆకుల సత్యనారాయణ బీజేపీకి రాజీనామా చేస్తున్నట్టు తెలిపారు. ఆయన బీజేపీని వీడి జనసేనలో చేరేందుకు రంగం సిద్ధం చేసుకున్నారు. సోమవారం బీజేపీ జాతీయ అధ్యక్షుడు అమిత్ షాని కలిసి తన రాజీనామా లేఖను సమర్పించనున్నట్లు ఆకుల సత్యనారాయణ చెప్పారు. ఇప్పటికే ఆయన ఢిల్లీ కూడా చేరుకున్నట్లు సమాచారం. బీజేపీకి రాజీనామా చేసిన అనంతరం ఆయన జనసేనలో చేరనున్నట్లు తెలుస్తోంది. ఈ విషయంపై ఇప్పటికే పవన్‌తో సంప్రదింపులు జరిపినట్టు తెలుస్తోంది. పవన్ గ్రీన్ సిగ్నల్ ఇవ్వడంతోనే ఆయన బీజేపీకి రాజీనామా చేస్తున్నట్టు సమాచారం. మరో రెండు మూడు రోజుల్లో ఆకుల సత్యనారాయణ అధికారికంగా జనసేన తీర్థం పుచ్చుకోనున్నారు. ఆకుల సత్యనారాయణ భార్య లక్ష్మీ పద్మావతి పవన్‌కు వీరాభిమాని. ఉద్దానం కిడ్నీ బాధితులను ఆదుకోవాలంటూ శ్రీకాకుళంలో జనసేన అధినేత పవన్‌కల్యాణ్‌ చేసిన దీక్షకు మద్దతుగా రాజమండ్రి సబ్‌కలెక్టర్‌ ఆఫీసు వద్ద దీక్ష చేశారు. ఈ సందర్భంగా భర్త ఒకపార్టీలో, భార్య ఒకపార్టీలో ఉన్న విషయాన్ని ప్రస్తావించగా అటువంటిదేమి లేదని, తాను పవన్‌కల్యాణ్‌ అభిమానినని, ఉద్దానం బాధితులకు మద్దతుగా కులమతాలు, రాజకీయాలకు అతీతంగా జరుగుతున్న దీక్షలో పాల్గొన్నానని ఆమె తెలిపారు. ఇటీవల జనసేన పార్టీకి సంబంధించిన కార్యక్రమాల్లో ఆమె పాల్గొన్నారు. దీంతో ఎమ్మెల్యే ఆకుల సత్యనారాయణ జనసేనలో చేరడం లాంఛనమేనని అంటున్నారు.