ప్రధాని నరేంద్ర మోదీపై సంచలన వ్యాఖ్యలు చేశారు ప్రజాశాంతి పార్టీ అధ్యక్షుడు కేఏ పాల్. మోదీ తనకు మంచి మిత్రుడేనని.. అయినా తిరిగి ప్రధాని కాలేరంటున్నారు. సెక్యులరిజం పేరుతో అధికారంలోకి వచ్చి కమ్యునలిజం తెచ్చారంటూ మండిపడ్డారు. గురువారం విజయవాడలో మీడియాతో మాట్లాడిన పాల్.. తాజా రాజకీయాలు, సార్వత్రిక ఎన్నికలపై ఆసక్తికరమైన వ్యాఖ్యలు చేశారు. 2014లో తన మద్దతుతోనే మోదీ ప్రధాని అయ్యారంటున్నారు పాల్. ఎన్నికల సమయంలో మోదీ తన దగ్గరకు వచ్చి మద్దతు ఇవ్వమని అడిగారన్నారు. ఇద్దరం బీసీలమే, ఇద్దరికి ఫ్యామీలీలు లేవు, దేశమే మన ఫ్యామిలీ అని మోదీ తనతో చెప్పినట్లు తెలిపారు. ఇద్దరం కలిసి దేశాన్ని అభివృద్ధి చేద్దామని.. చిన్న కుర్రాడిలా తనను వేడుకున్నారన్నారు. మోదీకు మద్దతు ఇవ్వొద్దని అద్వానీ తనను కోరినట్లు పాల్ చెప్పుకొచ్చారు. 2013 అక్టోబర్ 1న ఇంటికి డిన్నర్‌కు పిలిచి.. చేతులు జోడించి గంటన్నరపాటు తనను బతిమాలారని తెలిపారు. మోదీకి సపోర్ట్ చేయొద్దు.. ఆయన ఒక్క హామీని కూడా నెరవేర్చలేరని తనతో చెప్పారన్నారు. తాను మోదీగారి ఇంటికి వెళ్లలదేని.. ఆయనే తన దగ్గరికి వచ్చారన్నారు.. కానీ అద్వానీ గారి ఇంటికి మాత్రం వెళ్లానన్నారు. వచ్చే ఎన్నికల్లో ప్రజాశాంతి పార్టీ గెలుపు ఖాయమన్నారు పాల్. వారసత్వ రాజకీయాలకు వ్యతిరేకంగా పార్టీని ఏర్పాటు చేశానని.. ఆంధ్రప్రదేశ్‌లో టీడీపీ, వైసీపీని గెలిపిస్తే.. బీజేపీ గెలిపించినట్లే అన్నారు. ఆ రెండు పార్టీలో త్వరలోనే భూస్థాపితం కాబోతున్నాయని వ్యాఖ్యానించారు. రాష్ట్రంలో అవినీతిని అంతం చేసి.. అభివృద్ధి చేయటమే ప్రజాశాంతి పార్టీ లక్ష్యమన్నారు. ప్రజాశాంతి పార్టీలో చేరిన మొదటి 60 వేల మందికి తాము అధికారంలో వచ్చిన వెంటనే ఉద్యోగాలు కల్పిస్తామన్నారు. తన పార్టీలోకి సభ్యులను చేర్పిస్తే డబ్బు ఇస్తానని చెప్పారు. ఐదేళ్లలో అమరావతిని హైదరాబాదుకు ధీటుగా తయారు చేస్తామని హామీ ఇచ్చారు. రూ. 7 లక్షల కోట్లు నిధులను విదేశాల నుంచి తెచ్చి రాష్ట్రాన్ని అభివృద్ధి చేస్తామన్నారు.