పవన్ కళ్యాణ్‌ను విమర్శించొద్దంటూ ఏపీ సీఎం చంద్రబాబు నాయుడు తెలుగు దేశం పార్టీ నాయకులకు సూచించారు. ఇటీవల జరిగిన మీడియా సమావేశంలో పవన్‌తో కలిస్తే తప్పేంటని ఎదురు ప్రశ్నించిన బాబు.. జనసేనానిని విమర్శించొద్దంటూ చేసిన తాజా వ్యాఖ్యలు ప్రాధాన్యాన్ని సంతరించకున్నాయి. శుక్రవారం నిర్వహించిన టెలీకాన్ఫరెన్స్‌లో పార్టీ నేతలతో బాబు ఇలా మాట్లాడటం.. జనసేనతో పొత్తుకు బాబు సిద్ధపడుతున్నారనే సంకేతాలను పంపుతున్నాయి. బాబు ఆదేశాలతో.. గతంలో జగన్, మోదీ, కేసీఆర్‌‌లతోపాటు పవన్‌పై కూడా విమర్శలు గుప్పించిన టీడీపీ నేతలు ఇక నుంచి జనసేనానికి మినహాయింపు కల్పించాల్సిన పరిస్థితి తలెత్తింది. గత ఎన్నికల్లో పవన్ మద్దతు ప్రకటించడం టీడీపీ విజయానికి దోహదం చేసింది. వచ్చే ఎన్నికల్లోనూ జనసేనానితో కలిసి నడవాలని బాబు యోచిస్తున్నట్టు ఆయన మాటలను బట్టి అర్థం అవుతోందని రాజకీయ విశ్లేషకులు అభిప్రాయపడుతున్నారు. 

కానీ వచ్చే ఎన్నికల్లో తాము 175 స్థానాల్లో పోటీ చేస్తామని, లెఫ్ట్ పార్టీలతో మాత్రమే పొత్తు ఉంటుందని ఇప్పటికే పవన్ స్పష్టం చేశారు. ఆ తర్వాత రాజకీయ పరిణామాలు మారాయి. ఇటీవలే కేటీఆర్, జగన్ మధ్య చర్చలు జరిగాయి. వైఎస్‌ఆర్ కాంగ్రెస్ పార్టీకి టీఆర్ఎస్ మద్దతునిస్తున్నట్టు దీన్ని బట్టి స్పష్టమైంది. తెలంగాణ ఎన్నికల్లో టీఆర్ఎస్‌కు పరోక్షంగా మద్దతు పలికిన పవన్‌కు.. జగన్‌తో చెలిమి దిశగా కేసీఆర్ తీసుకున్న నిర్ణయం నచ్చదనడంలో సందేహం లేదు. ఈ నేపథ్యంలో బాబుతో దోస్తీకి పవన్ సిద్ధపడతారా? లేదా? అనేది మరికొద్ది రోజుల్లో తేలనుంది.