:ఛత్తీస్‌గఢ్‌ రాష్ట్రం సుకుమా జిల్లాలో పోలీసులపై మావోయిస్టులు పంజా విసిరారు. రహదారి పనులకు రక్షణగా వెళుతున్న బలగాలపై ఆదివారం మాటు వేసి కాల్పులు జరిపారు. ఈ దాడిలో ఇద్దరు పోలీసులు, రహదారి సూపర్‌వైజర్‌ మృతి చెందారు. మరో ఆరుగురు పోలీసులకు గాయాలయ్యాయి. సుకుమా జిల్లాలోని బెజ్జి ప్రాంతం నుంచి చింతగుప్ప వరకు రహదారి పనులు జరుగుతుండగా డీఆర్‌జీ, ఎస్‌టీఎఫ్‌ బలగాలు రక్షణ బాధ్యతలు నిర్వర్తిస్తున్నాయి.ఎల్లర్‌మడుగు వద్ద పనులు జరుగుతున్న ప్రాంతంలో మాటు వేసిన మావోయిస్టులు పోలీస్‌ బలగాలపై దాడికి పాల్పడ్డారు.

పరుగులు పెడుతున్న పోలీసులపై కాల్పులు జరిపారు. ఈ ఘటనలో ఇద్దరు పోలీసులు, రహదారి పనులు పర్యవేక్షిస్తున్న సూపర్‌వైజర్‌ మృతి చెందారు. ఆరుగురు పోలీసులకు గాయాలు కాగా, మెరుగైన వైద్యం కోసం హెలికాప్టర్‌లో రాయ్‌పూర్‌ తరలించారు. అనంతరం ప్రత్యేక బలగాలు కూంబింగ్‌ ముమ్మరం చేశాయి.
కాగా, బెజ్జి ప్రాంతంలో జరిగిన ఎదురుకాల్పుల్లో ఒక మావోయిస్టు మృతి చెందినట్టు సమాచారం.