మెగా బ్రదర్ నాగబాబుకి ఏమైంది? ఎందుకు ఇలా ఒక్కొక్కర్ని టార్గెట్ చేస్తూ సినీ రాజకీయ వర్గాల్లో హాట్ టాపిక్ అవుతున్నారు. మొన్నటి వరకూ నందమూరి బాలక్రిష్ణను టార్గెట్ చేస్తూ.. వరుసగా ఆరు వీడియోలను విడుదల చేసి నందమూరి అభిమానుల ఆగ్రహాన్ని చవిచూసిన నాగబాబు.. రూటు మార్చి సొంతంగా సోషల్ మీడియాలో సొంత దుకాణం ఓపెన్ చేసి మరీ విమర్శల దాడి పెంచారు. మై ఛానల్ నా ఇష్టం’ పేరుతో ఓ యూట్యూబ్ ఛానల్‌ను ఓపెన్ చేసి రాజకీయ విమర్శలకు తెరతీశారు. తొలిత ఈ ఛానల్ ‘సరదాగా నవ్వుకోడానికే తప్పా, ఎలాంటి దురద్దేశం లేదని.. వ్యక్తిగతంగా ఎవర్నీ ఉద్దేశించి మాట్లాడకపోయినా, రాజకీయపరమైన విమర్శలు మాత్రం ఈ ఛానల్ ద్వారా వెల్లడిస్తానని’ చెప్పిన నాగబాబు వరుసగా లోకేష్, జగన్, చంద్రబాబులను టార్గెట్ చేస్తూ ఇన్ డైరెక్ట్‌గా వ్యక్తిగత దూషణలకు దిగుతున్నారు. నారా లోకేష్‌ని చిన్న పిల్లాడితో పోలుస్తూ.. గతంలో లోకేష్ బాబు టంగ్ స్లిప్ అవుతూ మాట్లాడిన మాటల్ని ప్రస్తావించారు. ‘ఎలాంటి బంధుప్రీతి, మతపిచ్చి, కులపిచ్చి ఉన్న పార్టీ ఈ రాష్ట్రంలో ఏదన్నా ఉందంటే అది టీడీపీనే’ అంటూ పొరపాటున చేసిన వ్యాఖ్యలను నాగబాబు ఈ వీడియోలో చూపించి.. లోకేష్ బాబుకి ఓ.. వేసుకోమని సైటైర్లు గుప్పించారు. ఇక నెక్స్ట్ టార్గెట్‌గా జగన్‌పై విమర్శల దాడి పెంచుతూ.. జగన్ ఇటీవల ఓ ఇంటర్వ్యూలో జర్నలిస్ట్ అడిగిన ప్రశ్నకు సమాధానంగా ‘మీరు నన్నే ఎందుకు ప్రశ్నిస్తున్నారు.. చంద్రబాబుని ఎందుకు అడగరు’ అన్నదానికి కౌంటర్ ఇచ్చారు నాగబాబు. ‘ఇక్కడ జగన్ మాటల్లో ఒకటి గుర్తించాలి. వీడు నాకన్నా గొప్పవాడు. అంటే అర్థం ఏంటి? వీడు చాలా గొప్పవాడు నేను కూడా గొప్పవాడినే. ఇతడు నాకన్నా ఎక్కువ సాధించాడు అంటే అర్ధం ఏంటి? అతను బాగా సాధించాడు.. నేను కూడా ఎంతో కొంత సాధించాను అని. అలాగే కొన్ని కొన్నిసార్లు వాడు నాకంటే పెద్ద ఎదవ అంటారు. అంటే అర్ధం ఏంటి.. వాడు పెద్ద ఎదవ నేను ఓ రేంజ్ ఎదవనని. వాడు నాకంటే దుర్మార్గుడు అంటే నేను దుర్మార్గుడ్ని అని. నాకన్నా పెద్ద దొంగ అంటే నేను కూడా దొంగనే అంటూ’ అంటూ ఆయనకు మాత్రమే అర్ధమైన లాజిక్‌తో మ్యాజిక్ చేస్తూ.. జగన్‌కి సైతం ఓ.. కొట్టారు. అయితే నాగబాబు కామెంట్స్‌పై సినీ, రాజకీయ వర్గాల్లో పెద్ద చర్చే నడుస్తోంది. ఎప్పుడో బాలయ్య తన ఫ్యామిలీని ఏదో అన్నారని.. కరెక్ట్‌గా ‘కథానాయకుడు’ మూవీ రిలీజ్‌కి దగ్గర్లో వరుసగా వీడియోలు రిలీజ్ చేయడం.. బాలయ్యపై విమర్శలు గుప్పించడం వెనుక రాజకీయ ఉద్దేశం ఉందనేది బహిరంగ రహస్యమే. ఇక లోకేష్, చంద్రబాబు, జగన్‌లను టార్గెట్ చేస్తూ.. పొరపాటున నోరుజారిని కామెంట్స్‌ని బూజు దులిపి ఇప్పుడు ‘నా ఇష్టం’ అంటూ తన యూ ట్యూబ్ ఛానల్‌లో చూపించడం ద్వారా ఆయనకు ఏదో ఒరుగుతుంది అనుకుంటే పొరపాటే. అప్పట్లో లోకేష్ బాబు పొరపాటున మాట్లాడినా.. బాలయ్య తడబడినా.. సోషల్ మీడియాలో ఓ ఆట ఆడుకున్నారు. ఇప్పుడు వాటిని తెరపైకి తీసుకు రావడం వల్ల జనసేనకు నష్టమే తప్ప లాభం లేదు. ఒక రాజకీయ పార్టీని ముందుకు నడిపించాలి అంటే ఒక వర్గం ప్రజలకు చేరువైతే సరిపోదు. అన్ని వర్గాలను కలుపుకుని పోవాలి. అయితే మొన్న బాలయ్య ఫ్యాన్స్‌ని కెలికిన నాగబాబు వరుసగా ఇలా ఒక్కొక్కర్ని టార్గెట్ చేస్తూ పోవడం అందర్నీ ఆశ్చర్యానికి గురి చేస్తోంది. నాగబాబు వీడియోల వల్ల జనసేనకు నష్టం చేకూరే ప్రమాదం ఉందని పవన్‌ను అమితంగా అభిమానించే వారే అభిప్రాయపడుతున్నారు. మెగా బ్రదర్ కామెంట్ల పట్ల ఓ నెటిజన్ స్పందిస్తూ.. ‘మాట తడబాటు ఎవరికైనా సహజం. దాన్ని కూడా ఇలా వెటకారం చేయడం మీ విజ్ఞత! ప్రజల్ని కంటికి రెప్పలా కాపాడే వాళ్లతో నేను పోరాడతాను అని మీ తమ్ముడు పవన్ పొరబాటున అన్నారు. అది కూడా తడబాటు కాదా? వీటిని వెటకారం చేయలేదు కదా? ఇలా చెప్పాలంటే చాలా ఉన్నాయి’ అంటూ అనిల్ కుమార్ నెక్కలపూడి అనే నెటిజన్ నాగబాబుని సూటిగా ప్రశ్నించారు.ఇదే కాదు.. గత ఎన్నికల్లో మోడీ, చంద్రబాబులను ఆకాశానికెత్తేస్తూ పవన్ చేసిన ప్రసంగాలు నెట్‌లో ఉన్నాయి. ఒకవేళ నాగబాబు నిజాయితీగా ప్రశ్నించాలి అనుకుంటే.. మొదటి ప్రశ్న ఇక్కడి నుండే మొదలు పెట్టాలి. పార్టీ ప్రయోజనం ఆశించి నాగబాబు ఇదంతా చేస్తున్నా.. ఆయన సిల్లీ కామెంట్స్ వల్ల జనసేన పార్టీకి లాభం కంటే నష్టమే ఎక్కువనేది పొలిటికల్ సర్కిల్స్ నుండి వినిపిస్తున్నమాట. న్యూట్రల్‌గా ఉన్నవారు, మధ్యతరగతి వర్గం నాగబాబు కామెంట్లతో జనసేనకు దూరమయ్యే ప్రమాదం లేకపోలేదు. చివరిగా.. ఎదుటి వారికి చురకపెట్టాలంటే.. మనం వాతకి సిద్ధపడాలి.. అప్పుడే మనం కొట్టే దెబ్బకి రీసౌండ్ ఉంటాది. లేదంటే తుస్.. మంటుంది.