విక్టరీ వెంకటేశ్‌కు ఈ సంక్రాంతి మరిచిపోలేని సంతోషాన్ని తీసుకొచ్చింది. వరుణ్‌తేజ్‌తో కలిసి వెంకీ నటించిన ‘F2’ సినిమా ఆయన కెరీర్లోనే బిగ్గెస్ట్ హిట్‌గా నిలిచింది. ఈ సంక్రాంతికి ఎన్టీఆర్-కథానాయకుడు, వినయ విధేయ రామ వంటి భారీ చిత్రాలతో పోటీపడిన ‘F2’ సంక్రాంతి విన్నర్‌గా నిలిచింది. సంక్రాంతి అల్లుళ్లుగా వెంకీ, వరుణ్ చూపించిన ఫ్రస్టేషన్‌కు ప్రేక్షకులు ఫిదా అయిపోయారు. పెళ్లయిన మగాళ్లంతా ఇది మన స్టోరీయే అని ఫీలైపోయి.. ఫ్యామిలీస్‌తో థియేటర్లకు క్యూ కట్టారు. అంతేగా అంతేగా అంటూ.. హీరోలిద్దరూ చేసే మేనరిజం మ్యాజిక్ చేసిందనే చెప్పాలి. నువ్వునాకు నచ్చావ్, మల్లీశ్వరి తర్వాత వెంకీలోని కామెడీ యాంగిల్‌ను వంద శాతం వాడుకున్న దర్శకుడు అనిల్ రావిపూడి అంటూ అందరూ ప్రశంసలతో ముంచెత్తుతున్నారు. సంక్రాంతికి విడుదలైన రెండు భారీ సినిమాలు కలెక్షన్లు రాబట్టేందుకు ఓపక్క ఆపసోపాలు పడుతుంటే.. మరోపక్క ‘ఎఫ్ 2 ’ అప్పుడే రూ.100కోట్ల క్లబ్‌లో చేరిపోయింది. సంక్రాంతి అల్లుళ్లు రూ.వంద కోట్లు రాబట్టారంటూ నిర్మాత సంస్థ శ్రీ వెంకటేశ్వర క్రియేషన్స్ ట్విట్టర్ ద్వారా ప్రకటించింది. జనవరి 12న విడుదలైన ఈ సినిమా రెండు వారాల్లో రూ.100కోట్ల గ్రాస్ కలెక్షన్లు సాధించింది. తెలుగు రాష్ట్రాలతో పాటు ఓవర్సీర్‌లోనూ బాక్సాఫీసును గడగడలాడిస్తోంది. వీరి జోరు ఇప్పట్లో ఆగేలా లేదని ట్రేడ్ పండితులు కూడా చెబుతున్నారు. చాలాకాలంగా సరైన హిట్ లేని వెంకటేశ్, ‘అంతరిక్షం’ సినిమాతో డీలాపడిన వరుణ్‌తేజ్‌ కెరీర్లకు వేయి ఏనుగుల బలం ఇచ్చింది ఈ సినిమా. అనిల్ రావిపూడికి ఇది వరుసగా నాలుగో విజయం కావడం విశేషం. గతేడాది సరైన సినిమా లేక నిరాశలో ఉన్న దిల్ రాజుకు కాసుల వర్షం కురిపిస్తోంది. ఇలా అందరికీ సంక్రాంతి సంతోషాన్ని తెచ్చిన ఈ సినిమా 2019లో తొలి బ్లాక్ బస్టర్‌గా నిలిచింది.