జకార్తా వేదికగా జరుగుతున్న ఇండోనేసియా మాస్టర్స్‌ బ్యాడ్మింటన్ టోర్నీలో భారత స్టార్ షట్లర్ సైనా నెహ్వాల్ సెమీస్‌లోకి దూసుకెళ్లింది. టోర్నీలో భాగంగా శుక్రవారం జరిగిన మహిళల సింగిల్స్‌ క్వార్టర్ ఫైనల్స్‌లో థాయ్‌లాండ్‌కి చెందిన పోర్న్‌పావీతో తలపడిన సైనా నెహ్వాల్ 21-7, 21-18 తేడాతో అలవోక విజయాన్ని అందుకుంది. మ్యాచ్ ఆరంభం నుంచి దూకుడుగా ఆడిన సైనా.. కేవలం 33 నిమిషాల్లోనే గేమ్‌ని ముగించడం విశేషం. గురువారం ప్రీక్వార్టర్స్‌లో ఇండోనేసియాకే చెందిన ఫిత్రియానీని ఓడించిన సైనా నెహ్వాల్.. ఈరోజు కూడా అదే జోరుని కొనసాగించింది. నిన్న కూడా 21-17, 21-15 తేడాతో వరుస సెట్లలో గెలుపొందిన ఈ భారత షట్లర్.. ఈరోజు ప్రత్యర్థికి ఎలాంటి అవకాశం ఇవ్వలేదు. తొలి సెట్‌ని నిమిషాల వ్యవధిలోనే సైనా ముగించినా.. రెండో సెట్‌లో మాత్రం పోర్న్‌పావీ కాస్త ప్రతిఘటన చూపింది. కానీ.. ఆఖర్లో పుంజుకున్న సైనా.. అలవోకగా సెట్‌ని ముగించి సెమీస్‌లో అడుగుపెట్టింది.