విశ్వవిఖ్యాత నటసార్వభౌమ స్వర్గీయ నందమూరి తారక రామారావు జీవిత చరిత్రను తెరపై ఆవిష్కరిస్తున్నామని ఆయన తనయుడు బాలకృష్ణ ప్రకటించగానే అందరి కళ్లు ఈ బయోపిక్‌పైనే పడ్డాయి. సినిమా ఎప్పుడెప్పుడు వస్తుందా అని నందమూరి అభిమానులతో పాటు సినీ ప్రేమికులంతా ఆసక్తిగా ఎదురు చూశారు. స్వయంగా బాలకృష్ణ టైటిల్ రోల్ పోషించి సినిమా నిర్మాణంలో కూడా భాగస్వామి కావడంతో భారీ అంచనాలు ఏర్పడ్డాయి. ఎన్టీఆర్ జీవితం మొత్తాన్ని కేవలం 2.30 గంటల్లో చెప్పలేమని భావించిన దర్శక నిర్మాతలు సినీ జీవితాన్ని ‘యన్.టి.ఆర్ - కథానాయకుడు’, రాజకీయ జీవితాన్ని ‘యన్.టి.ఆర్ - మహానాయకుడు’గా ప్రేక్షకులకు అందించాలని నిర్ణయించారు. తొలుత ‘కథానాయకుడు’ని సంక్రాంతి కానుకగా ప్రేక్షకుల ముందుకు తీసుకువచ్చారు. భారీ అంచనాల నడుమ విడుదలైన ఈ చిత్రం ప్రేక్షకులను ఆకట్టుకోవడంలో తీవ్రంగా విఫలమైంది. బాక్సాఫీసు వద్ద కలెక్షన్లు రాబట్టలేక డీలాపడింది. నిర్మాతలు, డిస్ట్రిబ్యూటర్లకు తీవ్ర నష్టాలు తెచ్చిపెట్టింది. దీంతో రెండో భాగం ‘మహానాయకుడు’పై నిర్మాతలు డైలమాలో పడ్డారు. ఫిబ్రవరి 7న ‘మహానాయకుడు’ను విడుదల చేస్తున్నట్లు మొదట ప్రకటించారు. దాన్ని తరవాత 15కి మార్చారు. ఇప్పుడు ఫిబ్రవరి 21 అని అంటున్నారు. ఇదంతా ‘కథానాయకుడు’ డిజాస్టర్ ప్రభావమే. ప్రస్తుతం ‘మహానాయకుడు’ చిత్రం గురించి ఆలోచించే ప్రేక్షకుడే లేరంటే అతిశయోక్తి కాదు. ఇలాంటి పరిస్థితుల్లో ‘మహానాయకుడు’కి ఎలా ప్రచారం కల్పించాలో నిర్మాతలకు అర్థం కావడంలేదని సమాచారం. వాస్తవానికి గతంలో రెండు భాగాలకు ఒకేసారి ప్రచారం కల్పించారు. పోస్టర్లు, ట్రైలర్ కూడా రెండు భాగాలకు కలిపే విడుదల చేశారు. కానీ అవేమీ ఇప్పుడు పనిచేసేలా కనిపించడంలేదు. అందుకే ఇప్పుడు ప్రేక్షకులను ఆకట్టుకోవడానికి కొత్తగా ప్రచార కార్యక్రమాలు చేపట్టాలని నిర్మాతలు నిర్ణయించారట. డిస్ట్రిబ్యూటర్ల నుంచి ఒత్తిడి ఎక్కవకావడంతో ఎలాగైనా ‘మహానాయకుడు’పై ప్రేక్షకుల్లో ఆసక్తిని రేకెత్తించేలా ప్రచార కార్యక్రమాలు నిర్వహించాలని చూస్తున్నారట. ఆ తరవాత విడుదల తేదీ కూడా ఖరారు చేయనున్నట్లు తెలుస్తోంది.