తొలి సినిమా ‘ఉయ్యాల జంపాల’తోనే విజయాన్ని అందుకున్నాడు యంగ్ హీరో రాజ్ తరుణ్. ఆ తర్వాత కుమారి 21ఎఫ్, సీతమ్మ అందాలు.. రామయ్య సిత్రాలు, సినిమా చూపిస్తా మావాతో దూసుకుపోయాడు. అయితే సినిమాల సెలక్షన్‌లో తొందరపాటుతో ఆ తర్వాత వరుస పరాజయాలు ఎదుర్కొ్నాడు. కిట్టు ఉన్నాడు జాగ్రత్త, రంగుల రాట్నం, రాజుగాడు, లవర్స్.. సినిమాలు పరాజయం పాలయ్యాయి. దీంతో అతడితో సినిమా చేసేందుకు నిర్మాతలు జంకుతున్నారు. ఈ నేపథ్యంలోనే స్టార్ ప్రొడ్యూసర్ దిల్ రాజు.. రాజ్ తరుణ్‌తో సినిమా తీస్తున్నాడన్న వార్త ఫిల్మ్ నగర్ సర్కిళ్లలో హల్‌చల్ చేస్తోంది. నిర్మాతగా ‘ఎఫ్‌2’తో బ్లాక్ బస్టర్ అందుకున్న దిల్ రాజు.. రాజ్ తరుణ్‌తో సినిమాతో సినిమా చేసేందుకు ముందుకొచ్చారట. వీరిద్దరి కాంబినేషన్లో వచ్చిన ‘లవర్స్’ బాక్సాఫీసు వద్ద డిజాస్టర్ టాక్ తెచ్చుకుంది. అయినప్పటికీ ఈ యంగ్ హీరోపై నమ్మకంతో దిల్ రాజు మరో అవకాశం కల్పించారట. గతంలో మహేష్ బాబు మేనల్లుడు గల్లా అశోక్‌తో సినిమా తీసేందుకు దిల్ రాజు సన్నాహాలు చేసుకున్నారు. దీనికోసం శశికుమార్ అనే నూతన దర్శకుడు కథ కూడా సిద్ధం చేశాడు. అయితే కొన్ని కారణాల వల్ల ఈ ప్రాజెక్ట్‌కు బ్రేక్ పడింది. ఈ కథపై పూర్తిగా నమ్మకంగా ఉన్న దిల్ రాజు దాన్ని ఎలాగైనా తెరకెక్కించాలని నిర్ణయించుకున్నారట. దీంతో గల్లా అశోక్ బదులు రాజ్ తరుణ్‌ను హీరోగా తీసుకుని ప్రాజెక్ట్ పట్టాలెక్కించేందుకు సిద్ధపడుతున్నారట. తక్కువ బడ్జెట్‌తో అనుకున్న సమయంలో సినిమా తీయాలని దర్శకుడిని ఆదేశించాడట. చిన్న హీరోలతో పెద్ద విజయాలు అందుకున్న దిల్ రాజు రాజ్ తరుణ్‌పై నమ్మకంతో అతడికి మరో అవకాశం ఇవ్వడం హర్షించదగ్గ విషయమే. రాజ్ తరుణ్ తీరు నచ్చని దిల్ రాజు గతంలో అతడిని ఓ ప్రాజెక్ట్ నుంచి తప్పించినట్లు వార్తలు వచ్చాయి. మళ్లీ ఇప్పుడు నమ్మకంతో ఇస్తున్న అవకాశాన్ని రాజ్ తరుణ్ ఎలా నిలబెట్టుకుంటాదో లేదో చూడాలి