వరుణ్ తేజ్ హీరోగా హరీష్ శంకర్ దర్శకత్వంలో ‘వాల్మీకి’ అనే సినిమా ప్రారంభమైన విషయం తెలిసిందే. తమిళ చిత్రం ‘జిగర్తాండ’కు ఇది రీమేక్. కార్తీక్ సుబ్బరాజ్ దర్శకత్వంలో వచ్చిన ఈ సినిమాను ఇప్పుడు తెలుగులో ‘వాల్మీకి’ పేరుతో హరీష్ శంకర్ రీమేక్ చేస్తున్నారు. ఈ చిత్రాన్ని 14 రీల్స్‌ ప్లస్‌ పతాకంపై రామ్‌ ఆచంట, గోపీ ఆచంట నిర్మిస్తున్నారు. రాక్‌స్టార్ దేవీశ్రీ ప్రసాద్ సంగీతం సమకూరుస్తున్నారు. ఆయానకా బోస్ సినిమాటోగ్రఫీ అందిస్తున్నారు. ఇదిలా ఉంటే ఇప్పుడు ‘వాల్మీకి’ టైటిల్ వివాదంలో చిక్కుకుంది. ‘జిగర్తాండ’ ఒక గ్యాంగ్‌స్టర్ స్టోరీ అని, అలాంటి కథకు తెలుగులో వాల్మీకి అనే పేరును ఎలా పెడతారంటూ ఆ సామాజికవర్గం నాయకులు వ్యతిరేకిస్తున్నారు. ఆ పేరును తక్షణమే తొలగించాలని డిమాండ్ చేస్తున్నారు. వాల్మీకి దొంగ కాదని హర్యానా హైకోర్టు కూడా తీర్పునిచ్చిందని, అలాంటిది ఆయన్ని ఒక దొంగగా పరిగణిస్తూ ఆయన పేరును గ్యాంగ్‌స్టర్ సినిమాకు పెట్టడమేంటని ప్రశ్నిస్తున్నారు. వాల్మీకి లోగోపైనే గన్ పెట్టడం పెద్ద తప్పని వాదిస్తున్నారు. వివాదాలు చేస్తేనే సినిమా బతుకుతుందనే భ్రమలో సినీ పరిశ్రమ ఉందని, ఇలాంటి వివాదాలు చేసి తమను కించపరుస్తున్నారని అంటున్నారు. కాగా, హరీష్ శంకర్ గత చిత్రం ‘దువ్వాడ జగన్నాథం’ కూడా వివాదంలో చిక్కుకుంది. ఆ సినిమాలోని ఒక పాట తమ మనోభావాలు దెబ్బతీసేలా ఉందని బ్రాహ్మణ సామాజికవర్గం అప్పట్లో అభ్యంతరం తెలిపింది. ఇప్పుడు ‘వాల్మీకి’ రెగ్యులర్ షూటింగ్ ప్రారంభం కాకముందే టైటిల్ వివాదంగా మారింది. మరి దీనిపై దర్శకుడు హరీష్ శంకర్ ఎలా స్పందిస్తారో చూడాలి. ‘వాల్మీకి’ చిత్ర ప్రారంభోత్సవం ఆదివారం హైదరాబాద్‌లోని రామానాయుడు స్టూడియోలో జరిగింది. వరుణ్‌ తేజ్‌పై చిత్రీకరించిన ఫస్ట్‌షాట్‌కు నిహారిక కొణిదెల క్లాప్‌ నివ్వగా, రామ్‌ బొబ్బ కెమెరా స్విచ్చాన్‌ చేశారు. సెన్సేషనల్‌ డైరెక్టర్‌ వి.వి.వినాయక్‌ తొలి సన్నివేశానికి దర్శకత్వం వహించారు. దర్శకుడు సుకుమార్‌ పూజా కార్యక్రమాలు నిర్వహించారు. ఈ కార్యక్రమంలో నిర్మాత దిల్ రాజు, వరుణ్ తేజ్ తల్లి పద్మజ, నిర్మాత నవీన్ ఎర్నేని కూడా పాల్గొన్నారు.