సినీనటి భానుప్రియపై ఉచ్చు బిగుస్తోంది. మైనర్ బాలికను పనిలో పెట్టుకోవడంతో పాటు దొంగతనం నేరం మోపి వేధించడం, ఆమె బంధువొకరు బాలికను లైంగికంగా వేధించినట్లు ఆరోపణలు వచ్చిన సంగతి తెలిసిందే. దీంతో భానుప్రియను అరెస్ట్ చేయాలని కోరుతూ బాలల హక్కుల సంఘం ఆంధ్రప్రదేశ్ డీజీపీకి ఫిర్యాదు చేసింది. చదువుకోవాల్సిన బాలికను పనిలో పెట్టుకున్నందుకు ఆమెపై కఠిన చర్యలు తీసుకోవాలని ఫిర్యాదులో పేర్కొన్నారు.పిల్లలతో అక్రమంగా పనిచేయించుకునే వారు ఎక్కడున్నా అరెస్ట్ చేసే అధికారం పోలీసులకు ఉంటుందని బాలల హక్కుల సంఘం నేత అచ్యుతరావు తెలిపారు. ఈ కేసును తప్పుదోవ పట్టించుకునేందుకు ఏపీ పోలీసులు ప్రయత్నిస్తున్నారని ఆరోపించారు. మైనర్ బాలికను పనిలో పెట్టుకున్నానని భానుప్రియ మీడియా సాక్షిగా చెప్పినా చర్యలు తీసుకోవడానికి ఎందుకు వెనకాడుతున్నారో చెప్పాలని డిమాండ్ చేశారు. తూర్పుగోదావరి జిల్లా పెద్దాపురానికి చెందిన ప్రభావతి అనే మహిళ తన కూతురు సంధ్య(16)ను చెన్నైలోని భానుప్రియ ఇంట్లో పనికి కుదిర్చింది. అయితే ఏడాదిగా తన కుమార్తెను ఇంటికి పంపించడం లేదని, గట్టిగా అడిగితే రూ.10లక్షలు ఇవ్వాలని డిమాండ్ చేస్తున్నారని ప్రభావతి కొద్దిరోజుల క్రితం సామర్లకోట పోలీసులకు ఫిర్యాదు చేసింది. ఏడాదిగా జీతం ఇవ్వడం లేదని, దొంగతనం నేరం మోపి తన కూతురితో కనీసం ఫోన్లో కూడా మాట్లాడనివ్వడం లేదని ఫిర్యాదులో పేర్కొంది. దీనిపై విచారణ జరుపుతున్నామని, భానుప్రియ చెన్నైలో నివాస ఉండటంతో అక్కడి పోలీసులతో సంప్రదిస్తున్నామని సామర్లకోట పోలీసులు చెబుతున్నారు. అయితే ఈ ఆరోపణలను భానుప్రియ కొట్టిపారేశారు. తన ఇంట్లో సంధ్య డబ్బు, నగలు దొంగిలించినందుకు ప్రశ్నిస్తే.. ఆమె తల్లి తనపైనే కేసు పెట్టిందన్నారు. సంధ్య తల్లి ప్రభావతిపై చెన్నైలో కేసు పెడతానని భానుప్రియ తెలిపారు.