మెగాస్టార్ చిరంజీవి మెగామూవీ ‘సైరా’ ఈ సినిమా ఎప్పుడు విడుదల అనేదాని మీద కొన్ని సందేహాలు జనాల్లో వున్నాయి. దసరాకు అని కొందరు, కాదు సంక్రాంతికే అని కొందరు అనుకోవడం కామన్. నిర్మాత రామ్ చరణ్ కూడా విడుదల మీద పూర్తి క్లారిటీ ఇప్పటి వరకు ఇవ్వలేదు. దసరాకు రావాలనుకుంటున్నాం అనే టైపులోనే చెబుతూ వస్తున్నారు.లేటెస్ట్ సమాచారం ప్రకారం సైరా సినిమా దసరా టార్గెట్ గానే రెడీ అవుతోందని తెలుస్తోంది. ఇప్పటికి ఇంకో యాభై వర్కింగ్ డేస్ వరకు షూట్ బకాయి వుందని తెలుస్తోంది. అయితే ఒక లొకేషన్ అని కాకుండా మల్టిపుల్ లోకేషన్లలో షూట్ బకాయి వుంది. వీటిలో రాజస్థాన్ లోని కోటలు కొన్ని వున్నాయి. అలాగే మరి కొన్ని ప్రాంతాల్లో కూడా షూట్ బకాయి వుంది. ప్రస్తుతం రామోజీ ఫిల్మ్ సిటీ ప్రాంతంలో భారీ పాట చిత్రీకరణ జరుగుతోంది.

ఎలా లేదన్నా, మార్చి చివరకు లేదా ఏప్రియల్ నెలాఖరు లోపు టొటల్ షూట్ వర్క్  పూర్తయిపోతుందని యూనిట్ వర్గాల బోగట్టా. దసరా కు విడుదల అనుకున్నా అక్కడికి ఇంకా ఆరునెలలు టైమ్ వుంటుంది. సి జి వర్క్ కు, పోస్ట్ ప్రొడక్షన్ కు ఇది సరిపోతుందని యూనిట్ భావిస్తోంది. ఆగస్టులో సాహో విడుదల అయిపోతే, దసరాకు సైరా రావడానికి ఇక ఏ ఒక్క అడ్డంకి కూడా లేదు. మరే పెద్ద హీరో సినిమా కానీ, మిడిల్ రేంజ్ హీరో సినిమాలు కానీ దసరా కు వుండకపోవచ్చు. పైగా సైరా వస్తోంది అంటే ఒకవేళ రావాలనుకున్నవి కూడా దారిచ్చేస్తాయి.ఇదిలా వుంటే సైరా దసరాకు రావడమే తమకు మంచిదనే ఆలోచనలో బన్నీ-త్రివిక్రమ్ సినిమా యూనిట్ వుంది. ప్రశాంతంగా సంక్రాంతి టార్గెట్ గా తమ సినిమాను రెడీ చేసుకోవచ్చని వాళ్ల ఆలోచన.