ఆంధ్ర రాజధాని అమరావతిలో తిరుమల శ్రీవేంకటేశ్వరుడి ఆలయ నిర్మాణానికి అంకురార్పణ కార్యక్రమం వైభవంగా జరిగింది. గుంటూరు జిల్లా తుళ్లూరు మండలం వెంకటపాలెంలో గురువారం ఉదయం ముఖ్యమంత్రి చంద్రబాబు నాయుడు చేతుల మీదుగా ఆగమోక్తంగా వైదిక క్రతువులు నిర్వహించారు. ఆలయ నిర్మాణానికి సంబంధించి భూకర్షణం, బీజావాపనం కోసం చంద్రబాబు ప్రత్యేక పూజలు చేశారు. అయితే ఈ కార్యక్రమానికి దేవాదాయశాఖ మంత్రిగా ఉన్న డిప్యూటీ సీఎం కేఈ కృష్ణమూర్తికి మాత్రం ఆహ్వానం అందలేదట. తనకు ఆహ్వానం అందకపోవడం, టీటీడీ అధికారుల తీరుపై డిప్యూటీ సీఎం మండిపడ్డారట. దేవాదాయశాఖ మంత్రిగా ఉన్న తనకు ఆహ్వానం పంపకపోవడం ఏంటని తీవ్ర అసంతృప్తి వ్యక్తం చేశారట. దేవాదాయశాఖ అధికారులు కూడా కార్యక్రమం గురించి కేఈకి సమాచారం ఇవ్వలేదని తెలుస్తోంది. అందుకే డిప్యూటీ సీఎం వెంకటపాలెంలో జరిగిన కార్యక్రమానికి దూరంగా ఉన్నారు. ఈ వ్యవహారంపై డిప్యూటీ సీఎం అసెంబ్లీ దగ్గర మీడియా చిట్‌చాట్‌‌గా మాట్లాడారట. టీటీడీలో కొందరు అధికారులు ప్రభుత్వాన్ని శాసిస్తున్నారని.. టీటీడీ అధికారులను దారికి తేవడంలో ప్రభుత్వ పెద్దలకు కొన్ని పరిమితులు ఉండి ఉంటాయని వ్యాఖ్యానించారట. క్లిష్టమైన రెవిన్యూ శాఖ కంటే దేవదాయ శాఖ కష్టంగా మారిందన్నారట. ఒక్కోసారి దేవదాయ శాఖ వదులుకోవాలని అనిపిస్తోందని వ్యాఖ్యానించారట.