ఆంధ్రప్రదేశ్‌ శాసన సభలో అధికార టీడీపీ, బీజేపీ సభ్యుల మధ్య శుక్రవారం తీవ్ర వాగ్వాదం చోటుచేసుకుంది. పార్టీ ఫిరాయింపుల అంశంపై కార్మిక శాఖ మంత్రి కింజరాపు అచ్చెన్నాయుడు, బీజేపీ ఎమ్మెల్యే విష్ణుకుమార్‌ రాజులు ఒకరిపై ఒకరు విమర్శనాస్త్రాలు సంధించుకున్నారు. ఇటీవల టీడీపీ ఎమ్మెల్యే రావెల కిశోర్ బాబు, మేడా మల్లికార్జున రెడ్డి, బీజేపీ ఎమ్మెల్యే ఆకుల సత్యన్నారాయణల రాజీనామాలను ఆమోదిస్తూ స్పీకర్‌ నేడు నిర్ణయం తీసుకున్నారు. ఈ సందర్భంగా మంత్రి అచ్చెన్నాయుడు మాట్లాడుతూ.. బీజేపీ ఎమ్మెల్యే ఆకుల సత్యనారాయణ పార్టీకి ఎందుకు రాజీనామా చేశారో సమాధానం చెప్పాలని ప్రశ్నించారు. ఈ సమయంలో కలుగుజేసుకున్న బీజేపీ ఎమ్మెల్యే విష్ణుకుమార్ రాజు.. మీ ఎమ్మెల్యే మేడా మల్లికార్జున రెడ్డి ఎందుకు రాజీనామా చేశారో చెబితే, ఆయన గురించి నేనూ చెబుతానని కౌంటర్‌ వేశారు. అంతేకాదు, కేవలం ముగ్గురు ఎమ్మెల్యేల రాజీనామాలను ఆమోదిస్తే సరిపోదని, పార్టీ ఫిరాయించిన 23 మందిని ఎందుకు బయటకు పంపడం లేదని ప్రజలు అడుగుతున్నారని సభలో వ్యాఖ్యానించారు. ఈ సందర్భంగా కేంద్రం తీరుపై అచ్చెన్నాయుడు విమర్శలు గుప్పించడంతో వీటిపై కూడా బీజేపీ ఎమ్మెల్యే దీటుగా బదులిచ్చారు. రాష్ట్రానికి కేంద్రం ఎన్ని నిధులు ఇచ్చిందో ఆర్థిక మంత్రి యనమల రామకృష్ణుడికి తెలుసునని, అందుకే టీడీపీ సభ్యులంతా నల్లచొక్కాలు ధరించి అసెంబ్లీకి హాజరైనా ఆయన మాత్రం ధరించలేదని వ్యంగ్యాస్త్రాలు సంధించారు. అలాగే, ప్రత్యేక హోదా విషయంలో యూ టర్న్‌ తీసుకున్నారని, ఇప్పుడు పవన్‌ విషయంలోనూ అదే పరిస్థితి కనిపిస్తోందని ఆయన ఎద్దేవా చేశారు. నిన్నమొన్నటి వరకు జగన్‌, పవన్‌, బీజేపీ ఒకటేనని విమర్శించిన అధికార పార్టీ, ఇప్పుడు లోపాయికారీగా పవన్‌ కల్యాణ్‌తో సయోధ్యకోసం ప్రయత్నిస్తోందని విమర్శించారు. మిత్ర ద్రోహం చేసిన పార్టీ టీడీపీ అని విష్ణుకుమార్ రాజు మండిపడ్డారు. ప్రతిపక్ష పార్టీలకు మాట్లాడే అవకాశం ఇవ్వడం లేదని, మా గొంతు నొక్కే ప్రయత్నం చేస్తున్నారని ధ్వజమెత్తారు. ప్రభుత్వం ఇలా చేయడం వల్లే ప్రధాన ప్రతిపక్షం సభకు రాకుండా బాయ్‌కాట్ చేస్తోందని అన్నారు. గురువారం సైతం చంద్రబాబు, టీడీపీని ఉద్దేశించి సెటెర్లు వేసిన విషయం తెలిసిందే. చంద్రబాబు దెబ్బకు తెలంగాణలో టీడీపీ, కాంగ్రెస్, బీజేపీలు ఓడిపోయావంటూ వ్యాఖ్యలు చేశారు.