ప్రముఖ నటి భానుప్రియ ఇంట్లో తన కుమార్తె వేధింపులకు గురవుతోందని, ఆమె సోదరుడు లైంగికంగానూ వేధిస్తున్నాడంటూ తూర్పుగోదావరి జిల్లా సామర్లకోటకు చెందిన ప్రభావతి అనే మహిళ ఆరోపణలు గుప్పించి విషయం తెలిసిందే. అయితే, ఈ కేసు తాజాగా మలుపు తిరిగింది. భానుప్రియ ఇంట్లో పనిచేసే బాలిక వేధింపులకు గురి కాలేదని, తల్లి ప్రోద్బలంతో దొంగతనానికి పాల్పడినట్టు చెన్నై పోలీసులు గుర్తించారు. అంతేకాదు, ఆ కేసు నుంచి తప్పించుకోవడానికే భానుప్రియ కుటుంబంపై ఈ ఆరోపణలను తెరపైకి తెచ్చినట్టు గుర్తించిన పాండీబజార్ పోలీసులు వారిద్దరినీ అరెస్ట్ చేశారు. కొన్నేళ్లుగా భానుప్రియ ఇంట్లో పనిచేస్తోన్న సంధ్య, బీరువా తాళాలు ఎక్కడ పెడతారో గమనించి రూ. 1.50 లక్షల నగదు, నగలు దొంగిలించి తల్లికి ఇచ్చినట్టు పోలీసులు తెలిపారు. ఆపై భానుప్రియ కుటుంబసభ్యులు నిలదీస్తే, నేరం అంగీకరించి నగలను వెనక్కు ఇచ్చినట్టు పేర్కొన్నారు. మిగతా డబ్బు అడుగుతారని భావించి, తప్పుడు కేసు పెట్టారని, వారిద్దరినీ మరింత లోతుగా విచారిస్తున్నామని అన్నారు. మరోవైపు, మైనర్ బాలికను పనికి నియమించుకోవడం పట్ల బాలల హక్కుల సంఘాలు మండిపడుతున్నాయి. అంతేకాదు, బాలికను లైంగికంగా వేధించారని ఆరోపణలు రావడంతో ఆమెపై కఠిన చర్యలు తీసుకోవాలని డిమాండ్ చేస్తున్నాయి. భానుప్రియపై కేసు నమోదుచేసి, అరెస్ట్ చేయాలని కోరుతున్నారు. ఇదే విషయమై మూడు రోజుల కిందట భానుప్రియను అరెస్ట్ చేయాలని కోరుతూ ఆంధ్రప్రదేశ్ డీజీపీకి బాలల హక్కుల సంఘం ఫిర్యాదు చేసింది. చదువుకోవాల్సిన బాలికను పనిలో పెట్టుకున్నందుకు ఆమెపై కఠిన చర్యలు తీసుకోవాలని ఫిర్యాదులో పేర్కొన్నారు. 

పెద్దాపురానికి చెందిన ప్రభావతి తన కుమార్తె సంధ్య(16)ను చెన్నైలోని భానుప్రియ ఇంట్లో పనికి కుదిర్చింది. అయితే ఏడాదిగా తన కుమార్తెను ఇంటికి పంపించడం లేదని, గట్టిగా అడిగితే రూ.10లక్షలు ఇవ్వాలని డిమాండ్ చేస్తున్నారని ప్రభావతి గత కొద్ది రోజుల కిందట సామర్లకోట పోలీసులకు ఫిర్యాదు చేసింది. ఏడాదిగా జీతం ఇవ్వడం లేదని, దొంగతనం నేరం మోపి తన కూతురితో కనీసం ఫోన్లో కూడా మాట్లాడనివ్వడం లేదని ఫిర్యాదులో పేర్కొంది. దీనిపై విచారణ జరుపుతున్నామని, భానుప్రియ చెన్నైలో నివాస ఉండటంతో అక్కడి పోలీసులతో సంప్రదిస్తున్నామని సామర్లకోట పోలీసులు చెబుతున్నారు.