సీఎం చంద్రబాబు నాయుడు కొత్త గెటప్‌లో దర్శనమిచ్చారు. ఆటో డ్రైవర్ చొక్కా ధరించి అందరిలోనూ ఉత్సాహం నింపారు. చొక్కా ధరించడమే కాదు.. స్వయంగా ఆటో నడిపి సందడి చేశారు. అమరావతిలోని ముఖ్యమంత్రి నివాసం ఇందుకు వేదికైంది. ఆటోలపై జీవితకాల పన్ను రద్దు చేస్తూ ఏపీ ప్రభుత్వం ఇటీవల నిర్ణయం తీసుకున్న సంగతి తెలిసిందే. ఈ నిర్ణయం పట్ల సంతోషం వ్యక్తం చేస్తున్న ఆటో డ్రైవర్లు.. చంద్రబాబుకు కృతజ్ఞతలు తెలిపేందుకు శనివారం  ఉదయం ఆయన నివాసానికి పెద్దసంఖ్యలో తరలివచ్చారు. ఈ సందర్భంగా చంద్రబాబు నాయుడు.. ఆటో డ్రైవర్లను ఉద్దేశించి మాట్లాడారు. తన జీవితానికి ఆటో డ్రైవర్ల జీవితానికి దగ్గర పోలికలు ఉన్నాయన్నారు. ఆటో నడుపుతూ డ్రైవర్లు తమ కుటుంబాన్ని పోషిస్తుంటే.. రాష్ట్రాన్ని నడుపుతూ ప్రజల సంక్షేమాన్ని తాను చూస్తున్నానని చంద్రబాబు వ్యాఖ్యానించారు. ఆటోవాలాలకు సీఎం చంద్రబాబు మరిన్ని వరాలు కురిపించారు. ఇంధన ఛార్జీలు, ఇన్సూరెన్స్ భారం కూడా తగ్గించేలా చర్యలు తీసుకుంటామని సీఎం వెల్లడించారు. ‘ప్రయాణికుల క్షేమం మీరు చూసుకోండి.. మీ క్షేమం నేను చూసుకుంటా. ఆటో డ్రైవర్లందరికీ పెద్దన్నగా ఉంటా’ అని చంద్రబాబు వారితో అన్నారు. ఆటో డ్రైవర్లు హర్షం వ్యక్తం చేశారు. ఎప్పుడూ పచ్చ చొక్కాల్లో దర్శనమిచ్చే చంద్రబాబు నాయుడు.. కేంద్రం ఏపీకి ప్రత్యేక హోదా ఇవ్వనందుకు నిరసనగా శుక్రవారం అసెంబ్లీలో బ్లాక్ షర్ట్ ధరించి వచ్చి ప్రత్యేకంగా నిలిచిన విషయం తెలిసిందే. ఆ మధ్య విజయవాడలో ఎయిర్ షో సందర్భంగా స్టైలిష్ కళ్లద్దాలు ధరించి.. ‘నాకు పైలట్ కావాలని ఉందంటూ..’ సరదాగా వ్యాఖ్యానించారు.