రెండు టీ20లు, ఐదు వన్డేల సిరీస్ కోసం ఆస్ట్రేలియా జట్టు త్వరలోనే భారత్‌లో పర్యటించనున్న సంగతి తెలిసిందే. టీ20 సిరీస్‌లో స్వల్ప మార్పులు చోటు చేసుకున్నాయి. తొలి టీ20 మ్యాచ్‌కు బెంగళూరు బదులు వైజాగ్ ఆతిథ్యం ఇవ్వనుంది. ఫిబ్రవరి 24న బెంగళూరు వేదికగా తొలి టీ20, ఫిబ్రవరి 27న వైజాగ్‌ వేదికగా రెండో టీ20 నిర్వహించేలా షెడ్యూల్ రూపొందించారు. కానీ ఫిబ్రవరి 24న బెంగళూరులో వాయుసేన ఎగ్జిబిషన్ నిర్వహించనుంది. అదే రోజు ప్రధాని మోదీ కూడా బెంగళూరు వస్తున్నారు.  మ్యాచ్ నిర్వహణ కోసం చిన్నస్వామి స్టేడియానికి సరైన భద్రత కల్పించలేమని పోలీస్ కమిషనర్ తెలిపారు. దీంతో మ్యాచ్‌లను మార్చుకుందామని కర్ణాటక క్రికెట్ సంఘం.. ఆంధ్ర క్రికెట్ సంఘాన్ని కోరింది. కర్ణాటక క్రికెట్ సంఘం అభ్యర్థనకు ఆంధ్ర క్రికెట్ సంఘం సానుకూలంగా స్పందించింది. మ్యాచ్‌ల వేదికలను పరస్పరం మార్చుకోవడానికి బీసీసీఐ కూడా గ్రీన్ సిగ్నల్ ఇచ్చింది. ఫిబ్రవరి 24న ఆదివారం కావడంతో తొలి టీ20కి స్టేడియం పూర్తిగా నిండిపోయే ఛాన్స్ ఉంది.