'చి. ల. సౌ’ సినిమాతో దర్శకుడిగా మారిన నటుడు రాహుల్ రవీంద్రన్.. తన రెండో సినిమాను కింగ్ నాగార్జునతో తెరకెక్కించడానికి సిద్ధమవుతున్నారు. నాగార్జున హీరోగా కె.విజయభాస్కర్ దర్శకత్వంలో వచ్చిన ‘మన్మథుడు’ ఎంత పెద్ద విజయం సాధించిందో అందరికీ తెలిసిందే. రొమాంటిక్ కామెడీ ఎంటర్‌టైనర్‌గా తెలుగు ప్రేక్షకులకు ఈ సినిమా ఎప్పటికీ గుర్తుండిపోతుంది. అలాంటి సినిమాకు రీమేక్‌గా ‘మన్మథుడు 2’ను రాహుల్ రవీంద్రన్ తెరకెక్కించనున్నారు. అయితే ఈ రొమాంటిక్ మూవీలో హీరోయిన్‌ పాత్ర కోసం కొన్నాళ్లుగా అన్వేషిస్తున్నారు. మొత్తానికి ఆ అన్వేషణ పూర్తయిందని అంటున్నారు. ‘ఆరెక్స్ 100’ సినిమాలో తన హాట్ లిప్‌లాక్‌లు, రొమాన్స్‌తో కుర్రకారును కట్టిపడేసిన రాయల్ రాజ్‌పుత్ ఇప్పుడు నాగార్జునతో రొమాన్స్ చేయబోతోందని సమాచారం. ‘మన్మథుడు 2’లోని ప్రధాన హీరోయిన్‌గా పాయల్‌ను ఎంపిక చేసుకున్నారని తెలుస్తోంది. టాలీవుడ్‌లో రొమాంటిక్ హీరోగా పేరొందిన నాగార్జున సరసన అవకాశం రావడంతో పాయల్ వెంటనే ఓకే చెప్పేసిందట. అంతేకాదు, ఈ అవకాశం రావడం పట్ల ఆమె చాలా సంతోషంగా ఉందని టాక్. ‘ఆరెక్స్ 100’తో మంచి గుర్తింపు తెచ్చుకున్న పాయల్.. ‘మన్మథుడు 2’తో టాలీవుడ్‌లో నిలదొక్కుకోవడం ఖాయం అంటున్నారు. ఈ సినిమా త్వరలో పట్టాలెక్కనుంది. పోర్చుగల్‌లో తొలి షెడ్యూల్ షూటింగ్‌ను ప్రారంభించనున్నారు. ఈ చిత్రంలో నాగార్జున సరికొత్తగా కనిపించనున్నారట. సినిమాలో మరో హీరోయిన్‌కు అవకాశం ఉందట. ప్రస్తుతం ఆమె వేటలో యూనిట్ ఉందని సమాచారం. అయితే ఈ వార్తల్లో నిజమెంతో తెలియాలంటే అధికారిక ప్రకటన వచ్చేంత వరకు ఆగాల్సిందే. ఈ చిత్రంలో మిగిలిన తారాగణం, సాంకేతిక విభాగం తదితర అంశాలు కూడా ఖరారు కావాల్సి ఉంది.