ఏపీలో ఎన్నికలు దగ్గరపడే కొద్ది రాజకీయాలు వేడెక్కుతున్నాయి. ప్రధాన పార్టీలోకి వలసలు కూడా షురూ అవుతున్నాయి. టికెట్ హామీ, కొనసాగుతున్న పార్టీల్లో ప్రాధాన్యత దక్కని నేతలు పక్క చూపులు చూస్తున్నారు. మొన్నే రాజంపేట మాజీ ఎమ్మెల్యే మేడా మల్లికార్జున్ రెడ్డి టీడీపీకి షాక్ ఇవ్వగా.. తాజాగా మరో ఎమ్మెల్యే పార్టీ మారేందుకు సిద్ధమయ్యారనే ప్రచారం జరుగుతోంది. ప్రకాశం జిల్లా చీరాల ఎమ్మెల్యే ఆమంచి కృష్ణ మోహన్ మంగళవారం తన అనుచరులతో సమావేశం కావడం చర్చనీయాంశమయ్యింది. పందిళ్లపల్లిలోని తన నివాసంలో ఈ భేటీ ఏర్పాటు చేశారు. ఈ సమావేశంలో భవిష్యత్ కార్యాచరణతో పాటూ పార్టీ మారే అంశంపై చర్చించినట్లు తెలుస్తోంది. సాయంత్రంలోపు ఓ ప్రకటన చేసే అవకాశం ఉంది. ఆమంచి ఇప్పటికే వైసీపీతో టచ్‌లో ఉన్నారని.. బుధవారం ఆ పార్టీ అధినేత జగన్‌ను కలిసే అవకాశం ఉందని తెలుస్తోంది. ఆమంచి కృష్ణ మోహన్ 2014కు ముందు చీరాల నుంచి కాంగ్రెస్ ఎమ్మెల్యేగా గెలిచారు. తర్వాత జరిగిన ఎన్నికల్లో కాంగ్రెస్‌కు గుడ్ బై చెప్పి స్వతంత్ర అభ్యర్థిగా పోటీ చేసి గెలిచారు. తర్వాత చంద్రబాబు సమక్షంలో టీడీపీలో చేరారు. కొద్దిరోజులుగా ఆమంచి పార్టీ మారే ఆలోచనలో ఉన్నారని జిల్లాలో చర్చ నడిచింది. జనసేనవైపు చూస్తున్నారని.. పవన్ కళ్యాణ్‌ను కూడా కలిశారని ప్రచారం జరిగింది. కాని ఆయన చూపు ఇప్పుడు వైసీపీ వైపు ఉందని చీరాలలో టాక్.