సుప్రీమ్ హీరో సాయి ధరమ్ తేజ్‌కు ప్రస్తుతం గడ్డుకాలం నడుస్తోంది. ‘సుబ్రమణ్యం ఫర్ సేల్’, ‘సుప్రీమ్’ సినిమాల తర్వాత తేజూకు ఆ స్థాయి విజయం దక్కలేదు. ఏడాదికి రెండు మూడు సినిమాలు చేస్తున్నా.. ఈ మెగా హీరో అభిమానులను తీవ్రంగా నిరాశపరుస్తున్నారు. వి.వి.వినాయక్ లాంటి స్టార్ డైరెక్టర్ తెరకెక్కించిన ‘ఇంటిలిజెంట్’ సినిమా డిజాస్టర్‌గా మిగిలిపోయింది. ఆ తరవాత కరుణాకరన్ దర్శకత్వంలో వచ్చిన ‘తేజ్ ఐ లవ్ యూ’ కూడా ఆకట్టుకోలేకపోయింది. వరుసగా ఆరు ఫ్లాపులతో డీలాపడిన తేజూను ‘చిత్రలహరి’ గట్టెక్కిస్తుందని అంటున్నారు. వాస్తవానికి తేజూ ఆశలన్నీ ‘చిత్రలహరి’పైనే ఉన్నాయి. ఈ సినిమాతో ఎలాగైనా హిట్టుకొట్టి మళ్లీ ట్రాక్‌లోకి రావాలని చూస్తున్నారు. ఇదిలా ఉంటే, సాయిధరమ్ తేజ్‌ నెక్ట్స్ సినిమాకు సంబంధించి ఫిల్మ్‌ నగర్‌లో ఒక రూమర్ వినిపిస్తోంది. పవర్ స్టార్ పవన్ కళ్యాణ్ చేయాల్సిన ప్రాజెక్ట్‌ను సాయి ధరమ్ చేయబోతున్నాడంటూ ప్రచారం జరుగుతోంది. తన మేనళ్లుడు తేజూకు ఎప్పటి నుంచో ఒక పెద్ద ప్రాజెక్ట్‌ను సెట్ చేయాలని పవన్ చూస్తున్నారట. దీనిలో భాగంగా తాను ఎ.ఎం.రత్నంతో చేయాల్సిన సినిమాను తేజూకు బదిలీ చేయాలని నిర్ణయించుకున్నారని సమాచారం. పవన్‌తో ‘ఖుషి’ లాంటి బ్లాక్ బస్టర్‌ను అందించిన ఎ.ఎం.రత్నం.. పవర్ స్టార్‌తో మరో సినిమా చేయాలని అనుకున్నారు. దీనికి పవన్ కూడా అంగీకరించారు. కానీ ఆ ప్రాజెక్ట్ పట్టాలెక్కలేదు. అయితే, ప్రస్తుతం సినిమాలకు దూరంగా ఉన్న పవన్.. తన మేనళ్లుడితో సినిమా చేయాలని ఎ.ఎం.రత్నంను కోరారట. మంచి కథను తానే ఎంపిక చేసి, దర్శకుడిని కూడా ఖరారు చేసి చెప్తానని రత్నంకు సూచించారట. ఈ వార్తలో నిజమెంతో తెలియదు కానీ.. మేనళ్లుడి కోసం పవన్ తపన చూసి అభిమానులు మాత్రం ఫుల్ ఖుషీ అయిపోతున్నారు.