జనసేన అధినేత పవన్ కళ్యాణ్ పక్కా ప్రణాళికతో ముందుకు వెళ్తున్నారు. ఆంధ్రప్రదేశ్‌లో అసెంబ్లీ ఎన్నికలు దగ్గరపడుతుండటంతో పార్టీని బలపరిచే దిశగా అడుగులు వేస్తున్నారు. ఇతర రాజకీయ పార్టీల మాదిరిగా ఆర్థికంగా, ప్రజాదారణ పరంగా బలమైన నేతలను కాకుండా మేధావులకు జనసేనాని స్థానం కల్పిస్తున్నారు. ఈ మధ్యకాలంలో చాలా మంది మేధావులు జనసేనలో చేరారు. వారిలో కొంత మందిని ముఖ్యమైన పదవుల్లో పవన్ కూర్చోబెట్టారు. బీవీ రాజు ఎడ్యుకేషనల్ సొసైటీ చైర్మన్ విష్ణు రాజు, ఏపీజే అబ్దుల్ కలాం సైంటిఫిక్ సలహాదారు పోన్‌రాజ్, రిటైర్డ్ డీఐజీ రవికుమార్ మూర్తి.. ఇలా చాలా మందిని పార్టీలోకి పవన్ ఆహ్వానించారు. అయితే విద్యావంతులు, మేధావులకు జనసేన పార్టీలో సముచిత స్థానాన్ని కల్పిస్తుండటం పట్ల హీరో మంచు మనోజ్ స్పందించారు. పవన్ కళ్యాణ్‌పై ప్రశంసలు కురిపించారు. ‘ప్రజా సేవచేయడానికి విద్యావంతుల సహాయం తీసుకుంటేనే దానికొక విలువ, అర్థం ఉంటుంది. పవన్ కళ్యాణ్ సార్ ఇలాంటి చొరవ తీసుకుని వాళ్లపై నమ్మకం ఉంచి, గౌరవంతో జనసేన పార్టీలోకి తీసుకోవడం పట్ల చాలా ఆనందంగా ఉంది’ అని మనోజ్ తన ట్వీట్‌లో పేర్కొన్నారు