కొన్ని కథలు మనుషుల్ని హత్తుకుంటాయ్.. మరికొన్ని కథలు మనసుల్ని హత్తుకుంటాయి. అలా మనసుల్ని హత్తుకునే కథలు అప్పుడప్పుడు మాత్రమే వస్తుంటాయి. అలా వచ్చిన చిత్రమే వైఎస్ఆర్ బయోపిక్ ‘యాత్ర’. వైఎస్ రాజశేఖర్ రెడ్డి పాదయాత్ర అంటే కాంగ్రెస్‌ను అధికారంలోకి తీసుకురావడానికి, ఆయన ముఖ్యమంత్రి కావడానికి దోహదపడిందనే భావన చాలా మందిలో ఉంది. అయితే ఆ పాదయాత్రకు రాజశేఖర్ రెడ్డి పూనుకోవడానికి గల కారణాలు, పాదయాత్రలో భాగంగా రాజన్నకు ఎదురైన అనుభవాలు, ఆయనకు ప్రజలు ఏ విధంగా నీరాజనం పట్టారు వంటి అంశాలను దర్శకుడు ఈ చిత్రంలో చూపించారు. రాయలసీమకు చెందిన ఈ మహానేత రెండు రాష్ట్రాల ప్రజల గుండెల్లో సుస్థిర స్థానాన్ని ఏ విధంగా సంపాదించారో తెరపై ఆవిష్కరించారు. జననేతగా తెలుగు వారి గుండెల్లో పదిలమైన చోటు దక్కించుకున్న దివంగత మాజీ ముఖ్యమంత్రి డాక్టర్ వైఎస్ రాజశేఖర్ రెడ్డి జీవిత కథ ఆధారంగా తెరకెక్కిన చిత్రం ‘యాత్ర’. వైఎస్సార్ చేపట్టిన పాదయాత్రను ఆధారంగా చేసుకుని మహి వి. రాఘవ్ ‘యాత్ర’ సినిమాను తెరకెక్కించారు. వైఎస్సార్ పాత్రలో మలయాళ సూపర్ స్టార్ మమ్ముట్టి నటించారు. విజయమ్మ పాత్రలో నటి, నాట్యమణి ఆశ్రిత వేముగంటి కనిపించారు. జగపతిబాబు, అనసూయ, రావు రమేశ్, సుహాసిని, సచిన్ ఖేదేకర్ ముఖ్య పాత్రలు పోషించారు. ఈ చిత్రం టైటిల్ ఎనౌన్స్ చేసిన ద‌గ్గ‌ర‌నుండి వై.ఎస్.ఆర్ అభిమానుల్లోనే కాక సాధారణ ప్ర‌జ‌ల్లో కూడా ఈ సినిమాపై ఆసక్తి నెల‌కొంది. దీనికి కార‌ణం ఓ మ‌హానేత చ‌రిత్రను తెర‌కెక్కిస్తుండటమే. సరిగ్గా ఎన్నికల ముందు వైఎస్ బయోపిక్‌ను విడుదల చేస్తున్నారంటే.. ఇది ఎన్నికల స్టంటా లేక ఈ చిత్రం ఇప్ప‌ుడు తీయ‌వ‌ల‌సిన అవ‌స‌రం ఏమిటి? అధికార పార్టీని ఈ సినిమా ద్వారా ఇరుకున పెట్టే ప్రయత్నం చేస్తున్నారా? లాంటి రకరకాల సందేహాలు, అనుమానాలు సినీ రాజకీయ వర్గాల్లో చర్చాంశనీయమయ్యాయి. ఈ తరుణంలో ఈ సందేహాలకు సమాధానంగా నేటి నుండి థియేటర్స్‌లో ‘యాత్ర’ మొదలైంది. కథ ఏంటంటే.. దర్శకుడు ముందుగా చెప్పినట్టే వైఎస్ఆర్ బయోపిక్ మూవీని కీలకమైన పాదయాత్ర నేపథ్యంలోనే ఎమోషనల్ డ్రామా‌గా రూపొందించారు. 2009 ఎన్నికలకు వైఎస్ఆర్ ఎలా సన్నద్ధమయ్యారు? అప్పటికి ప్రతిపక్షంలో ఉన్న వైఎస్ఆర్‌కి అధికార పార్టీ నుండే కాకుండా సొంత పార్టీ నుండి ఎదురైన ఇబ్బందులు ఏంటి? రాజకీయాలను వదిలేద్దామనే నిర్ణయానికి వైఎస్ ఎందుకు వచ్చారు? ఆయన పాదయాత్ర చేపట్టడం వెనుక కారణాలు ఏంటి? ఉచిత విద్యుత్, ఫీజురీయింబర్స్‌మెంట్, ఆరోగ్య శ్రీ, వృద్దాప్య పింఛన్లు తదితర సంక్షేమ పథకాలను ప్రవేశ పెట్టడం ద్వారా ఆయన తిరిగి ఎలా ముఖ్యమంత్రి కాగలిగారు? ఈ ప్రశ్నలకు సమాధానంగా ‘యాత్ర’ సినిమాను ఎమోషనల్ డ్రామాగా తెరకెక్కించారు దర్శకుడు. ఒక సినిమాకి కథ ఎంపికతోపాటు క్యారెక్టర్ సెలక్షన్ కూడా చాలా ముఖ్యం. ఇదే సినిమా సక్సెస్‌ను నిర్ణయిస్తుంది. ఎప్పుడైతే వైఎస్ పాత్రకు మలయాళ నటదిగ్గజం మమ్ముట్టిని ఎంపిక చేశారో.. అప్పుడే ఈ సినిమా సగం సక్సెస్ సాధించింది. మూడు నేషనల్ అవార్డ్స్, ఆరు స్టేట్ అవార్డ్స్, 12 ఫిల్మ్ ఫేర్‌లు, రెండు డాక్టరేట్‌లు.. పద్మశ్రీ మమ్ముట్టిని నట దిగ్గజం అనడానికి ఈ గణాంకాలు చాలు. నిజానికి ‘యాత్ర’ సినిమా ఓ ఎమోషనల్ జర్నీ. ఇందులో పెద్దగా కథ ఉండదు. పాత్రలే కథకు ప్రాణం. వైఎస్ఆర్‌గా లీడ్ రోల్ పోషించిన మమ్ముట్టి పాత్ర కోసం ప్రాణం పెట్టడం ఏంటో ఆయన నటన ద్వారా నిరూపితం చేశారు. వైఎస్ పాత్రలో ఒదిగిపోయారు.జాలి, ప్రేమ, కరుణ, దయ, పొగరు, లాంటి ఎమోషన్స్ పలికించడమే కాకుండా కొన్ని ఎమోషన్ సీన్లలో కళ్లతో నిర్ణయం చేయడం ఎలాగో చూపించారు. ముఖ్యంగా ఆరోగ్య శ్రీ పథకం పురుడు పోసుకోవడానికి దర్శకుడు రాసిన హాస్పటల్ సీన్‌లో ప్రేక్షకులతో కంటతడి పెట్టించారు. 15 నిమిషాలు పాటు సాగిన ఆ సీన్‌లో కళ్లు చెమర్చని ప్రేక్షకుడు ఉండడు అంటే అతిశయోక్తికాదు. అంతలా హార్ట్ టచ్చింగ్ పెర్ఫామెన్స్ ఇచ్చారు మమ్ముట్టి. ‘ఈ వయసులో ఏ పనీ చేయలేక.. మా పని మేం చేసుకోలేక.. చావలేక బతకలేక మా లాంటి ముసిలోళ్ల కోసం ఏదైనా మంచి పనిచేయయ్యా..’ అని ఓ అవ్వ దీనంగా వైఎస్‌ను అడగటం.. ఆమె మాటలకు చలించిపోయిన వైఎస్.. కళ్లతోనే హావభావాలు పలికిస్తూ ఆ అవ్వను దగ్గరకు తీసుకుని భరోసా ఇచ్చిన సీన్ హృద్యంగా ఉంది. ఇలాంటి భావోద్వేగ సన్నివేశాలతో ‘యాత్ర’ జర్నీ సాగింది. ఈ సీన్స్‌లో మమ్ముట్టి ఎక్స్‌ప్రెషన్స్ బట్టి ఆయన ఎందుకు మహానటుడు అయ్యాడో ఇట్టే అర్ధమౌతుంది. ఇక ఈ కథను డీల్ చేసిన విధానంతో దర్శకుడు మహి వి రాఘవకి ప్రశంసలు దక్కుతాయి. టైటిల్స్‌లోనే వైఎస్ బాల్యం, విద్యాభ్యాసం, పొలిటికల్ ఎంట్రీ, ముఖ్యమంత్రిగా ఎదిగిన తీరును చెప్పేసిన దర్శకుడు కేవలం పాదయాత్రను మాత్రమే మెయిన్ థీమ్‌గా ఎన్నుకుని పెద్ద ప్రయోగమే చేశారు. అయితే ఫస్టాఫ్ మొత్తం సాఫీగా నడిపిన దర్శకుడు సెకండాఫ్‌లో బలమైన సీన్లను రాసుకున్నారు. ముఖ్యంగా వైఎస్ ప్రవేశ పెట్టిన ఒక్కో సంక్షేమ పథకానికి ఒక్కో బలమైన కారణాన్ని చాలా ఎమోషనల్‌గా చూపించారు. ముఖ్యంగా పాత్రల ఎంపిక ద్వారా దర్శకుడు సక్సెస్ అయ్యారు. వైఎస్ పాత్రకు మమ్మట్టిని... విజయమ్మ పాత్రకు అశ్రితను.. కేవీపీ పాత్రకు రావు రమేష్‌ని.. రాజారెడ్డి పాత్రకు జగపతిబాబుని.. సబితా ఇంద్రారెడ్డి పాత్రకు సుహాసినిని.. ఇలా ప్రతి పాత్ర ఎంపికతో ఆయా పాత్రలకు జీవం పోసేలే బలమైన సీన్లు రాశారు దర్శకుడు. ఒకరితో ఒకరు పోటీపడి నటించి యాత్ర ద్వారా ఎమోషనల్ జర్నీని అందించారు. వాస్తవానికి యాత్ర మూవీ వస్తుంది అంటే.. ఇది అధికార టీడీపీ పార్టీపై ఎక్కుపెట్టిన బాణంలా ఉంటుందని చాలా మంది భావించారు. అయితే ఇందులో ఒకటి రెండు సీన్లలో మాత్రమే టీడీపీ ( సినిమాలో మనదేశం అని పేరు మార్చారు) ప్రస్తావన వచ్చింది. చంద్రబాబు ఫేమస్ డైలాగ్ ‘బ్రీఫ్డ్ మీ’ కూడా వాడేశారు కాని బలమైన విమర్శలైతే లేవు. అయితే ఈ సినిమా ద్వారా ఓ కొత్త విషయాన్ని ప్రేక్షకులకు అందించారు. వైఎస్ చనిపోయే వరకూ కాంగ్రెస్ పార్టీకి విధేయుడుగానే ఉన్నారు. అయితే 2009 ఎన్నికల ముందు సీట్ల కేటాయింపు, కాంగ్రెస్ పార్టీతో వైఎస్ విభేదించిన తీరుని కళ్లకు కట్టినట్టు చూపించారు. ఒకరకంగా టీడీపీ కంటే కాంగ్రెస్ పార్టీపైనే ఎక్కువ సెటైర్లు సంధించారు. వైఎస్ చనిపోయిన తరువాత ఎమ్మెల్యేలు అందరూ సంతకాలు సేకరించి వైఎస్ తనయుడ్ని ముఖ్యమంత్రి చేయాలని పట్టుబట్టినా.. అధిష్టానం జగన్‌ని కాదని రోషయ్యను ఎందుకు ముఖ్యమంత్రి చేసిందన్న ప్రశ్నకు ‘యాత్ర’ సినిమాతో ఆన్సర్ దొరుకుతుంది. టెక్నికల్ పరంగా.. నిర్మాతలు విజయ్ చిల్లా, శశి తక్కువ బడ్జెట్‌లో క్వాలిటీ అవుట్ పుట్ ఇచ్చారు. సినిమాను చాలా రిచ్‌గా ఉంది. ఈ విషయంలో సినిమాటోగ్రాఫర్ సత్యం సూర్యన్‌ను ప్రశంసలు దక్కుతాయి. ఇక కథానుగుణంగా వచ్చే పాటలు ‘యాత్ర’ సినిమాకు హెల్ప్ అయ్యాయి. కె. అద్భుతమైన స్వరాలను అందించారు. సిరివెన్నెల రాసిన పాటలు ఆకట్టుకున్నాయి. చివర్లో పెంచల్ దాస్ రాసి, పాడిన ‘మరుగైనావా రాజన్నా’ సాంగ్ ఎమోషనల్‌గా బరువెక్కిన గుండెలతో థియేటర్స్ బయటకు వచ్చేలా చేసింది. శ్రీకర్ ప్రసాద్ ఎడిటింగ్ వర్క్ బాగుంది. ఈ సినిమాకు రెండుగంటల రన్ టైం కూడా ప్లస్ అయ్యింది. చివరిగా.. సూటిగా సుత్తి లేకుండా.. కథలో భాగంగా.. లేనిపోని కలరింగ్స్ లేకుండా.. చెప్పాల్సిన విషయాన్ని సూటిగా.. ఎమోషనల్‌గా.. ప్రేక్షకుల్ని ఆకట్టుకునేలా.. కంటతడి పెట్టించేలా... కొంతమందికి పన్నీరులా.. ఇంకొంతమంది పంటి కింద రాళ్లులా ‘యాత్ర’ సాఫీగా సాగిపోతుంది.