ప్రధాని నరేంద్ర మోదీ పర్యటన ఆంధ్రప్రదేశ్ రాజకీయాల్లో కాక రేపుతోంది. గుంటూరు జిల్లాకు రానున్న మోదీని అడ్డుకునేందుకు అధికార టీడీపీ సహా వామపక్షాలు, ప్రజా సంఘాలు సిద్ధమయ్యాయి. గన్నవరం విమానాశ్రయం నుంచి గుంటూరు వరకు జాతీయ రహదారిపై ‘మోదీ గో బ్యాక్’ అంటూ భారీ ఫ్లెక్సీలు, హోర్డింగులు వెలిశాయి. రాష్ట్రాన్ని పట్టించుకోని మోదీకి రాష్ట్రంలో అడుగుపెట్టేందుకు అర్హత లేదని టీడీపీ నేతలు విమర్శలు చేస్తున్నారు. అయితే ఈ హోర్డింగులను చాలాచోట్ల పోలీసులు తొలగిస్తున్నారు. టీడీపీతో కటీఫ్ అయ్యాక తొలిసారి ఏపీ పర్యటనకు వస్తున్న మోదీని ఎలాగైనా అడ్డుకోవాలని టీడీపీ, ప్రజా సంఘాల నేతలు సన్నాహాలు చేస్తున్నారు. ప్రత్యేక హోదా, విశాఖ రైల్వే జోన్, కడప ఉక్కు పరిశ్రమ సహా విభజన హామీలేవీ నెరవేర్చని మోదీ తెలుగు వాడి సత్తా ఏంటో చూపిస్తామని నేతలు అంటున్నారు. గుంటూరులో జరిగే ప్రజా చైతన్య సభను ఎట్టి పరిస్థితుల్లోనూ జరగకుండా చూడాలని వారు భావిస్తున్నారు. రాష్ట్రంలో మోదీకి వ్యతిరేకంగా జరిగే ఆందోళనల వెనుక ముఖ్యమంత్రి చంద్రబాబు హస్తం ఉందని బీజేపీ నేతలు ఆరోపిస్తున్నారు. మోదీ రాష్ట్రానికి వస్తే తమ అవినీతి ఎక్కడ బయటపడిపోతుందోనని చంద్రబాబు ఆందోళన పడుతున్నారని అంటున్నారు. ఎవరెన్ని కుట్రలు చేసినా మోదీ పర్యటన దిగ్విజయంగా జరుగుతుందని, రాష్ట్ర ప్రభుత్వ కుట్రలు సాగనివ్వబోమని బీజేపీ నేతలు హెచ్చరిస్తున్నారు. ఏదేమైనా గతేడాది నుంచి ఉప్పునిప్పులా మారిన టీడీపీ-బీజేపీ నేతల మధ్య మోదీ పర్యటన మరింత అగ్గి రాజేస్తోందనే చెప్పొచ్చు. మోదీ సభకు జనాన్ని సమీకరించే బాధ్యతను ప్రతిపక్ష వైసీపీ తీసుకుందంటూ టీడీపీ నేతలు విమర్శలు చేస్తుండటం రాజకీయంగా మరింత వేడిని రాజేస్తోంది.