భారత మిడిలార్డర్ బ్యాట్స్‌మెన్ సురేశ్ రైనా ఇప్పుడు క్రికెట్ ప్రపంచంలో అత్యుత్తమ ఫీల్డర్ అని దక్షిణాఫ్రికా మాజీ క్రికెటర్ జాంటీ రోడ్స్ కితాబిచ్చాడు. 1992లో అంతర్జాతీయ క్రికెట్‌‌లోకి ప్రవేశించిన జాంటీ రోడ్స్‌ అనతికాలంలోనే తన అద్భుతమైన ఫీల్డింగ్‌తో అందర్నీ ఆకర్షించాడు. ముఖ్యంగా.. 1992 ప్రపంచకప్‌లో పాకిస్థాన్ మాజీ క్రికెటర్ ఇంజిమామ్‌ ఉల్ హక్‌ని పక్షిలా వికెట్లపైకి దూకుతూ రనౌట్ చేసిన తీరు అప్పట్లో సంచలనంగా మారింది. ఆ తర్వాత కూడా మైదానంలో పాదరసాన్ని తలపిస్తూ జాంటీ రోడ్స్‌ ఎన్నో రనౌట్లు చేశాడు. అలాంటి.. ఫీల్డర్ ఇప్పుడు తాను సురేశ్ రైనా ఫీల్డింగ్‌కి వీరాభిమానినని చెప్పుకొచ్చాడు. ఐదుగురు బెస్ట్ ఫీల్డర్లని ఎంపిక చేయమని జాంటీరోడ్స్‌‌ని కోరగా.. సురేశ్ రైనాకి అగ్రస్థానమిచ్చిన ఈ దిగ్గజ క్రికెటర్.. ఆ తర్వాత ఏబీ డివిలియర్స్ (దక్షిణాఫ్రికా), పాల్ కాలింగ్‌వుడ్ (ఇంగ్లాండ్), గిబ్స్ (దక్షిణాఫ్రికా), ఆండ్రూ సైమండ్స్ (ఆస్ట్రేలియా)‌లను ఎంపిక చేశాడు. సురేశ్ రైనాకి నేను వీరాభిమాని. భారత్‌లో మైదానాలు ఎలా ఉంటాయో..? నాకు తెలుసు. కానీ.. మ్యాచ్‌తో సంబంధం లేకుండా.. ఎలాంటి స్థితిలోనైనా.. క్యాచ్‌ కోసం సురేశ్ రైనా సాహసోపేతంగా డైవ్ చేస్తాడు. దెబ్బ తగులుతుందేమో..? అని క్షణం కూడా అతను ఆలోచించడు. స్లిప్స్, ఔట్‌ఫీల్డ్‌లో అతను ఇప్పటికే అద్భుతమైన క్యాచ్‌లు అందుకున్నాడు. అందుకే అతనే నా నెం.1 ఫీల్డర్’ అని జాంటీ రోడ్స్ వెల్లడించాడు.