హిందీ సినీ పరిశ్రమలో తొలితరం ప్రసిద్ధ నటుల జాబితా తయారుచేస్తే అందులో కచ్చితంగా కచ్చితంగా ఉండే పేరు మధుబాల. బాలనటిగా సినిమాల్లోకి ప్రవేవించి సుప్రసిద్ధ నటిగా ఎనలేని పేరు ప్రఖ్యాతులు సంపాదించుకున్న మధుబాల అసలు పేరు ముంతాజ్ జహాన్ బేగం దేహ్లావి. ఈరోజు మధుబాల 86వ జయంతి సందర్భంగా ప్రముఖ సెర్చ్ ఇంజిన్ గూగుల్ ఆమెకు నివాళులర్పిస్తూ డూడుల్ రూపొందించింది. ఈ లోకాన్ని విడిచి 50ఏళ్లు గడుస్తున్నా ప్రేక్షకుల మనసుల్లో మాత్రం ఆమెది ఎప్పుడూ సుస్థిర స్థానమే. మధుబాల ఆప్ఘనిస్థాన్ నుంచి వలస వచ్చిన ఓ ముస్లిం కుటుంబంలో ఫిబ్రవరి 14, 1933లో ఢిల్లీలో జన్మించారు. పదకొండు మంది సంతానంలో ఈమె ఐదోవారు. ఆ తర్వాత వారి కుటుంబం ముంబయికి వచ్చేసింది. 1942లో ‘బసంత్’ అనే సినిమా ద్వారా బాలనటిగా తొమ్మిదేళ్ల వయస్సులో హిందీ సినీ పరిశ్రమలోకి ప్రవేశించారు మధు. ఇందులో ప్రసిద్ధ నటి ముంతాజ్ శాంతి కూతురిగా నటించారు. ఆ తర్వాత అనేక సినిమాల్లో యాక్ట్ చేశారు. నటి దేవికారాణి ఆమె పేరును మధుబాలగా మార్చారు. 1947లో వచ్చిన నీల్‌కమల్ చిత్రంలో రాజ్‌కపూర్‌ సరసన పద్నాలుగేళ్ల వయస్సుకే హీరోయిన్‌గా నటించారు. ఆ సినిమా విజయం సాధించకపోయినా నటిగా మధుబాలకు పేరు ప్రఖ్యాతులు సాధించిపెట్టింది. 1949లో వచ్చిన ‘మహల్’ చిత్రం తర్వాత మధుబాల అగ్రనటిగా మారిపోయారు. ఆమె అందం, అభినయం, ఆహార్యానికి ప్రేక్షకులు ఫిదా అయిపోయారు. దీంతో సినిమా అవకాశాలు క్యూ కట్టాయి. అయితే 1950 సంవత్సరం ఆమెకు పీడలక మిగిల్చింది. ఓ సమయంలో రక్తంతో కూడిన దగ్గు రావడంతో ఆమె పరీక్షలు చేయించుకున్నారు. వైద్యులు ఆమెకు గుండెలో రంధ్రం గుర్తించి చికిత్స అందించారు. ఆ వ్యాధికి సర్జరీ చేయాల్సి ఉన్నా అప్పటికి మనదేశంలో ఆ సదుపాయం అందుబాటులో లేదు. దీంతో తన సమస్యను బయటి ప్రపంచానికి తెలియకుండా జాగ్రత్త పడిన ఆమె నాలుగేళ్ల పాటు అనేక చిత్రాల్లో నటించారు. 1954లో ఆమెలోని విషాదం మీడియా ద్వారా ప్రపంచానికి తెలియడంతో అందరూ షాకయ్యారు. 36ఏళ్ల వయస్సులోనే 1969లో ఆమె ఈ లోకాన్ని విడిచి వెళ్లిపోయారు.మధుబాల కెరీర్లో ‘మొఘల్ ఎ ఆజం’ చిత్రం మైలురాయిగా చెప్పొచ్చు. అనార్కలిగా ఆమె పలికించిన అభినయం ఇన్నేళ్లయినా ప్రేక్షకులు మరిచిపోలేదు. 1951లో ప్రారంభమైన ఈ సినిమా 1960లో విడుదలైంది. ఆ ఏడాది ఉత్తమ హిందీ సినిమాగా జాతీయ చలనచిత్ర పురస్కారాన్ని అందుకుంది. ఇప్పటికీ మధుబాల ప్రస్తవన వస్తే ముందుగా గుర్తొకొచ్చేది అనార్కలి పాత్రే.