అన్న నందమూరి తారకరామారావు ఫ్యామిలీ నుండి ఎంత మంది హీరోలు వచ్చినా.. తాత పోలికలతో పుట్టిన జూనియర్ ఎన్టీఆర్ అంటే ప్రేక్షకుల్లో ఉన్న క్రేజ్ వేరు. వాస్తవానికి ఎన్టీఆర్ బయోపిక్ మూవీ నందమూరి బాలకృష్ణ కంటే జూనియర్ ఎన్టీఆర్ పర్ఫెక్ట్‌గా సరిపోయేవారని.. ఎన్టీఆర్ బయోపిక్ తొలిభాగం విడుదల తరువాత చాలా మంది ప్రేక్షకుల భావన. అయితే తాతగారిలా నేను నటించలేనని.. ఎన్టీఆర్ ముందే ఈ బయోపిక్ మూవీకి నో చెప్పేసిన విషయం అందరికీ తెలిసిందే. ఇదిలా ఉంటే.. తొలినుండి ఎన్టీఆర్ ఫ్యామిలీతో కాస్త గ్యాప్ మెయిన్‌టైన్ చేస్తూ ఉండేవారు ఎన్టీఆర్. అయితే 2009 ఎన్నికల్లో తెలుగుదేశం పార్టీ ప్రచారం చేయడంతో తాతగారి నటవారసత్వంతో పాటు రాజకీయ వారసత్వం తీసుకున్నారంటూ ప్రచారం నడిచింది. అయితే ఆ ఎన్నికల తరువాత ఎన్టీఆర్‌ని దూరం పెట్టడంతో ఆయన రాజకీయాల్లో ఇన్వాల్వ్ కాకుండా సినిమాలపైనే ఫోకస్ పెట్టి తన పని తాను చేసుకుపోతున్నారు. అయితే హరికృష్ణ మరణం నందమూరి ఫ్యామిలీతో సన్నిహితంగా ఉంటున్నారు జూనియర్ ఎన్టీఆర్. ఇక అసలు విషయానికి వస్తే.. ఇటీవల రామ్ గోపాల్ వర్మ దర్శకత్వం వహించిన వివాదాస్పద మూవీ ‘లక్ష్మీస్ ఎన్టీఆర్’ ట్రైలర్‌ను విడుదలైంది. ఇందులో ఎన్టీఆర్ జీవితంలోకి లక్ష్మీ పార్వతి ఎంటర్ అయ్యాక ఎలాంటి మార్పులు చోటుచేసుకున్నాయి. ఆయనతో లక్ష్మీ పార్వతి ఉన్న సంబంధం ఏంటి? నాడు జరిగిన రాజకీయ కీలక ఘట్టాల్లోని రహస్యాలను ‘లక్ష్మీస్ ఎన్టీఆర్’ చిత్రంలో చూపించబోతున్నారు రామ్ గోపాల్ వర్మ. ‘లక్ష్మీ పార్వతి’ ట్రైలర్‌పై లక్ష్మీ పార్వతి స్పందనను తెలియజేస్తూ.. ఎన్టీఆర్ ఫ్యామిలీకి చెందిన జూనియర్ ఎన్టీఆర్‌పై సంచలన కామెంట్స్ చేశారు. ఆవిడ ఏమన్నారో ఆమె మాటల్లోనే... ‘రామారావు గారితో వివాహం అయిన తరువాత జూనియర్ ఎన్టీఆర్‌ని నేనే మా ఇంటికి పిలిపించా. ఎంతైనా అతను కూడా మన మనవడే కదా పిలిపించి వాళ్ల తాతగారు నేను జూనియర్ ఎన్టీఆర్ ముగ్గురం కలిసి ఫొటో దిగాం. మధ్యలో జూ. ఎన్టీఆర్ ఉండి మా భుజాలపై చేతులు వేసి మరీ ఫొటో దిగాడు. మా గవర్నమెంట్ పడిపోయాక నా ఫొటో చింపి అవతల పడేశాడు. వాడు ఎప్పుడూ తాత గారితో ఉన్న ఫొటోనే చూపిస్తాడు. ఎంతైనా వాడూ ఏమీ తక్కువ కాదు కదా.. ఎవరికీ మినహాయింపు కాదు. ఆ రోజుల్లో జూ. ఎన్టీఆర్‌ని చాలా బాగా చూశాను. మంచి లిఫ్ట్ ఇచ్చాను. ఆయన్ని త్యాగరాజ గాన సభలో అరంగేట్రం చేయించాను. గడిచిపోయిన గతం కదా.. అందుకే జూ. ఎన్టీఆర్‌ అవన్నీ మరిచిపోయారు. లక్ష్మీ పార్వతి ఎప్పుడూ ఆత్మ గౌరవంతో బ్రతుకుతుంది. ఎవరిమీద ఎప్పుడూ ఆధారపడలేదు. నాకు రెస్పెక్ట్ ఇస్తే తప్పకుండా సపోర్ట్ ఇస్తా.. అదే సందర్భంలో జగన్ పార్టీని వదలను. అయినా వాళ్లకు అంత సంస్కారం లేదులే.. వాళ్ల గురించి ఎంత తక్కువ మాట్లాడితే అంత మంచిది’ అంటూ జూనియర్ ఎన్టీఆర్ సంచలన కామెంట్స్ చేశారు లక్ష్మీ పార్వతి. అయితే గతంలో కూడా పలు సందర్భాల్లో జూనియర్ ఎన్టీఆర్‌‌పై ఇదే తరహా కామెంట్స్ చేశారు లక్ష్మీ పార్వతి.