తెలుగు చిత్ర పరిశ్రమలో ఉన్న వైవిధ్యమైన దర్శకుల్లో ఇంద్రగంటి మోహన్‌కృష్ణ ఒకరు. ఆయన తీసిన సినిమాలన్నీ చిన్న చిన్నవే.. కానీ, ప్రతి సినిమాలో ఏదో ప్రత్యేకత ఉంటుంది. కిందటేడాది సుధీర్ బాబు, అదితిరావు హైదరి జంటగా ఇంద్రగంటి తెరకెక్కించిన ‘సమ్మోహనం’ ప్రేక్షకులను విపరీతంగా ఆకట్టుకుంది. ప్రస్తుతం తన తరవాత సినిమా పనుల్లో ఇంద్రగంటి బిజీగా ఉన్నారు. సుధీర్ బాబు, నానిలతో మల్టీస్టారర్‌ను ఇంద్రగంటి తెరకెక్కించనున్నారని ప్రస్తుతం ఇండస్ట్రీ టాక్. ‘అష్టా చమ్మా’ సినిమా ద్వారా నానిని తెలుగు ప్రేక్షకులకు పరిచయం చేసిన దర్శకుడు ఇంద్రగంటి. ఆ తరవాత వీరిద్దరూ కలిసి చేసిన ‘జెంటిల్‌‌మన్’ ప్రేక్షకాదరణ పొందింది. ఇప్పుడు ముచ్చటగా మూడోసారి వీరిద్దరూ జతకట్టబోతున్నారు. అయితే ఈసారి నానిని ఇంద్రగంటి హీరోగా చూపించడం లేదట. ఈ చిత్రంలో పూర్తిగా నెగిటివ్ షేడ్ ఉన్న పాత్రలో నాని కనిపించనున్నారని టాక్. మరో పాత్ర కోసం ఇంద్రగంటి ముందు దుల్కర్ సల్మాన్, నిఖిల్ సిద్ధార్థ్ పేర్లను పరిశీలించారట. అయితే సుధీర్ బాబు అయితే బాగుంటుందని ఆయన్ని ఫైనల్ చేశారని సమాచారం. ప్రస్తుతం నాని ‘జెర్సీ’ సినిమాతో బిజీగా ఉన్నారు. ‘మళ్లీ రావా’ ఫేమ్ గౌతమ్ తిన్ననూరి దర్శకత్వంలో ఈ సినిమా తెరకెక్కుతోంది. మరోవైపు విక్రమ్ కె.కుమార్‌తో ఇంకో సినిమాను నాని ప్రారంభించారు. ఈ సినిమా రెగ్యులర్ షూటింగ్ కూడా ప్రారంభమైంది. ఇప్పడు ఈ మూడో సినిమా తెరపైకి వచ్చింది. నేచురల్ స్టార్‌గా పేరొందిన నాని హీరోగా తానేంటో నిరూపించుకున్నాడు. ఇప్పుడు విలన్‌గా తన నట విశ్వరూపాన్ని ఏ మేరకు చూపిస్తారో చూడాలి