కేంద్ర దర్యాప్తు సంస్థ సీబీఐ తాజాగా ఐసీఐసీఐ బ్యాంక్ మాజీ సీఈవో చందా కొచ్చర్కు మరో షాకిచ్చింది. ఆమె దేశం విడిచి వెళ్లొచ్చనే అనుమానంతో ఎయిర్పోర్ట్ ఇమిగ్రేషన్ అధికారులను అప్రమత్తం చేసింది. ఈ నేపథ్యంలోనే కొచ్చర్పై లుక్ఔట్ నోటీసును జారీ చేసినట్లు తెలుస్తోంది. అత్యంత విశ్వసనీయ వర్గాలు ఈ విషయాన్ని తెలియజేశాయి. చందాకొచ్చర్ దేశం విడిచి వెళ్లడానికి ప్రయత్నిస్తే వెంటనే తెలియజేయాలని సీబీఐ.. ఎయిర్పోర్ట్ అధికారులను కోరింది.  ఐసీఐసీఐ బ్యాంక్-వీడియోకాన్ కేసుకు సంబంధించి క్విడ్ప్రోకో ఆరోపణలకు గానూ చందా కొచ్చర్పై సీబీఐ ఇప్పటికే ఎఫ్ఐఆర్ నమోదు చేసిన విషయం తెలిసిందే. సీబీఐ అలాగే చందా కొచ్చర్ భర్త దీపక్ కొచ్చర్, వీడియోకాన్ బాస్ వేణుగోపాల్ దూత్లపై కూడా ఎఫ్ఐఆర్ నమోదు చేసింది. ఐసీఐసీఐ బ్యాంక్- వీడియోకాన్ రుణం కేసులో రూ.3,250 కోట్ల మేర అక్రమాలు సాగాయని ఆరోపణులున్నాయి.  చందా కొచ్చర్పై గతేడాదే ఐసీఐసీఐ బ్యాంక్ విచారణ నేపథ్యంలో లుక్ఔట్ నోటీసు జారీ అయ్యిందనే వార్తలు వెలువడ్డాయి. అయితే అప్పుడు సీబీఐ అధికారులు చందాకొచ్చర్పై ఎలాంటి నోటీసులు జారీ కాలేదని స్పష్టతనిచ్చారు. కాగా వీడియోకాన్ గ్రూప్కు ఐసీఐసీఐ బ్యాంక్ రుణాల జారీ అంశమై సీబీఐ త్వరలోనే చందా కొచ్చర్, దీపక్ కొచ్చర్, దూత్లను ప్రశ్నించే అవకాశముందని తెలుస్తోంది.  2012లో ఐసీఐసీఐ బ్యాంక్ నుంచి వీడియోకాన్ గ్రూప్నకు రూ.3,250 కోట్ల రుణం మంజూరైన కొద్దినెలలకే ఆ కంపెనీ అధినేత వేణుగోపాల్ ధూత్.. చందా కొచ్చర్ భర్తకు చెందిన న్యూపవర్ సంస్ధలో కోట్లాది రూపాయల పెట్టుబడులు పెట్టినట్టు దర్యాప్తు సంస్ధలు ఆరోపిస్తున్నాయి. గతంలో సెబీ చేపట్టిన ప్రాధమిక దర్యాప్తులో చందా కొచ్చర్ భర్త దీపక్ కొచ్చర్ వీడియోకాన్ గ్రూప్తో పలుమార్లు వ్యాపార సంప్రదింపులు జరిపినట్టు వెల్లడైంది. దీపక్, వీడియోకాన్ చీఫ్ వేణుగోపాల్ ధూత్ న్యూపవర్ సహవ్యవస్దాపకులు కావడం గమనార్హం.