నంద్యాల ఉప-ఎన్నిక సందర్భంగా టీడీపీ అభ్యర్థి తరఫున ప్రచారం నిర్వహించిన హిందూపురం ఎమ్మెల్యే, నటుడు బాలకృష్ణ ఎన్నికల ప్రవర్తనా నియమావళిని ఉల్లంఘించారని వైసీపీ అప్పట్లో ఆరోపించిన విషయం తెలిసిందే. దీనిపై వైసీపీ అప్పటి ప్రధాన కార్యదర్శి కె. శివకుమార్ హైకోర్టులో పిటిషన్ దాఖలు చేశారు. ఈ వ్యాజ్యం జస్టిస్ ఏవీ రావు, జస్టిస్ డీవీఎస్ఎస్ సోమయాజులతో కూడిన ద్విసభ్య ధర్మాసనం ముందుకు శుక్రవారం విచారణకు వచ్చింది. ఈ సందర్భంగా బాలకృష్ణకు నోటీసులు జారీచేసిన హైకోర్టు, పిటిషనర్‌ నోటీసును అందజేసేందుకు కూడా అవకాశం కల్పించింది. మరోవైపు, ఈ వ్యాజ్యంపై అఫిడ్‌విట్ దాఖలు చేయాలని కేంద్ర ఎన్నికల సంఘాన్ని న్యాయస్థానం ఆదేశించింది. హైకోర్టు న్యాయమూర్తి జస్టిస్‌ ఏవీ శేషసాయి, జస్టిస్‌ డీవీఎస్‌ఎస్‌ సోమయాజులతో కూడిన ధర్మాసనం శుక్రవారం ఈ మేరకు ఆదేశాలు జారీచేసింది. అనంతరం విచారణను నాలుగు వారాలకు వాయిదా వేసింది. నంద్యాల ఉప ఎన్నికలో టీడీపీ అభ్యర్థి భూమా బ్రహ్మానందరెడ్డి తరఫున ప్రచారం నిర్వహించిన ఎమ్మెల్యే బాలకృష్ణ ఓటర్లకు బహిరంగంగా డబ్బు పంపిణీ చేశారని వైసీపీ ఆరోపించింది. ప్రజాప్రాతినిధ్య చట్టం కింద ఆయనపై కేసు నమోదు చేసేలా ఆదేశించాలని కోరుతూ కె.శివకుమార్‌ ఆగస్టు 2017లో హైకోర్టును ఆశ్రయించారు. శుక్రవారం నాటి విచారణలో పిటిషనర్‌ తరఫు న్యాయవాది వాదనలు వినిపిస్తూ.. ఎన్నికల నియమావళిని ఉల్లంఘించిన నేపథ్యంలో బాలకృష్ణపై కేసు నమోదు చేయాల్సిన బాధ్యత ఎన్నికల సంఘంపై ఉందని పేర్కొన్నారు. ఈ నేపథ్యంలో వ్యాజ్యంపై బాలకృష్ణ వాదనలు తెలుసుకోవడం తప్పనిసరని భావించిన ధర్మాసనం ఆయనకు నోటీసులు జారీచేసింది.