తెలుగు రాష్ట్రాల్లో రాజకీయాలతోపాటు తన రాజకీయ భవితవ్యంపై మాజీ మంత్రి సబ్బం హరి  కీలక వ్యాఖ్యలు చేశారు. ప్రస్తుత తరుణంలో తన ముందు రెండే దారులు ఉన్నాయని, అందులో ఒకటి టీడీపీలో చేరడం కాగా, రెండోది రాజకీయ సన్యాసమేనని పేర్కొన్నారు. ఇటీవలే పోలవరం ప్రాజెక్టును సందర్శించానని, దీనిపై బీజేపీ ఎంపీ జీవీఎల్ అసత్య ప్రచారం చేస్తున్నారని ధ్వజమెత్తారు. రాష్ట్రానికి ఆవగింజ అంత అయినా తన వంతు సాయం చేయాలని ఉందని అన్నారు. రాష్ట్రాల నుంచి కేంద్రానికి పన్నులు తదితర రూపంలో ఆదాయం వెళ్తతుందని, ప్రధాని నరేంద్రమోదీ ఏమీ ఆయన తాతలు సంపాదించిన ఆస్తిని ఇవ్వడం లేదని మండిపడ్డారు. పోలవరం విషయంలో కేంద్రం కక్ష సాధింపు చర్యలకు పాల్పడుతోందని, ప్రభుత్వ పరంగా రాజధానికి అవసరమైనవి చంద్రబాబు సమకూర్చుతున్నారని సబ్బం హరి ప్రశంసించారు.రాజధాని అమరావతి నిర్మాణం శరవేగంగా సాగుతోందని, ప్రస్తుత పరిస్థితుల్లో ప్రభుత్వం మారితే పనులు ఆగిపోతాయన్న భయం ప్రజల్లో కనిపిస్తోందని అన్నారు. ప్రస్తుతం రాష్ట్రంలో టీడీపీకే అనుకూల వాతావరణం ఉందని స్పష్టం చేసిన మాజీ ఎంపీ, రాజధానిలో ఒక్క పని కూడా ప్రారంభం కాలేదని కొందరు అసత్య ప్రచారం చేస్తున్నారని వ్యాఖ్యానించారు రాజధాని నిర్మాణం శరవేగంగా జరుగుతోందని, దీనిని ప్రతి ఒక్కరు గమనించాలని, అమరావతికి గతంలో భూములు ఇవ్వబోమన్న ఉద్దండరాయపాలెం రైతులు సైతం వందశాతం ముందుకొచ్చి ఇచ్చారని గుర్తు చేశారు. అలాగే, చంద్రబాబుపై ప్రజల్లో సదాభిప్రాయం ఉందని, పెద్దవాడు, గౌరవంగా మాట్లాడతాడన్న భావన కొన్ని వర్గాల్లో ఉందని మాజీ మంత్రి పేర్కొన్నారు. ఆయన మాత్రమే ఈ మాత్రమైనా అభివృద్ధి చేయగలిగాడని మరికొందరు అభిప్రాయపడుతున్నారని, వడ్డించే విస్తరిలాంటి పరిస్థితిని చిందరవందర చేసుకోకూరాదని మరో వర్గం ప్రజలు భావిస్తున్నారని హరి వివరించారు. రెండోసారి చంద్రబాబే అధికారంలోకి రావాలని చాలామంది కోరుకుంటున్నారని సబ్బం హరి పేర్కొన్నారు. అంతేకాదు, నెగెటివ్ రాజకీయాలు చేసే వ్యక్తుల కంటే పాజిటివ్ రాజకీయాలు చేసే వ్యక్తులకు విలువ ఉంటుందని అన్నారు. తెలంగాణ ముఖ్యమంత్రి కేసీఆర్ చిల్లర రాజకీయాలకు మాత్రమే పనికొస్తారని తీవ్రస్థాయిలో దుయ్యబట్టారు. ఇటీవల జరిగిన ఎన్నికల్లో ఆయన సీఎం కాకూడదని చంద్రబాబు ప్రయత్నించినా అవి ఫలించలేదని పేర్కొన్నారు. చంద్రబాబువి పాజిటివ్ పాలిటిక్స్ అని, మోదీని టార్గెట్ చేయడం వల్లే ప్రస్తుత రాజకీయాల్లో మార్పు వచ్చిందని తెలిపారు. గత ఎన్నికల్లో బీజేపీకి 270కి పైగా స్థానాలు వచ్చాయని, ఈసారి అది 150-160కి పడిపోతుందని ఆయన జోస్యం చెప్పారు. ఇక, ఏపీలో అయితే బీజేపీ కనీసం ఖాతా కూడా తెరవదు కదా, డిపాజిట్లు కూడా రావని అన్నారు. కేంద్రంలో ప్రత్యామ్నాయ ప్రభుత్వం అంటూ ఏర్పడితే చంద్రబాబు కీలకంగా మారతారని మాజీ ఎంపీ సబ్బం హరి తన మనసులో మాటను వెల్లడించారు.