భారత స్టార్ షట్లర్ పీవీ సింధు తేలిక పాటి యుద్ధ విమానం 'తేజాస్'లో ప్రయాణించి అందర్నీ ఆశ్చర్యపరిచింది. బెంగళూరు వేదికగా జరుగుతున్న ‘ఏరో ఇండియా షో’లో శనివారం ఉమెన్స్ డే నిర్వహించారు. దీంతో.. షోకి హాజరైన పీవీ సింధు కోపైలెట్‌గా 'తేజాస్'లో విహరించింది. గ్రీన్ యూనిఫామ్ ధరించి 'తేజాస్'లోకి ప్రవేశించిన సింధు.. సాహసోపేతంగా యుద్ధ విమానంలో ప్రయాణించడంపై అభిమానులు ప్రశంసలు కురిపిస్తున్నారు. పూర్తి స్వదేశీ పరిజ్ఞానంతో తయారుచేయబడిన తేలిక పాటి యుద్ధ విమానంగా 'తేజాస్' వెలుగులోకి వచ్చింది. హిందూస్థాన్ ఏరోనాటిక్స్ లిమిటెడ్ (హెచ్ఎఎల్) దాదాపు 30ఏళ్ల శ్రమ తర్వాత వీటిని అభివృద్ధి చేసింది. ఇది వరకు ఉన్న యుద్ధ విమానాల కంటే తేజాస్ యుద్ధ విమానాలు నవీనమైనవి. గాల్లో ఉన్నప్పుడు కూడా వీటిలో ఇంధనాన్ని నింపుకోవచ్చు. కెరీర్ పరంగా మార్చి 6 నుంచి ప్రారంభంకానున్న ఆల్ ఇంగ్లాండ్ బ్యాడ్మింటన్ ఛాంపియన్‌షిప్‌ కోసం ప్రస్తుతం పీవీ సింధు సిద్ధమవుతోంది.