భారత వైమానిక దళం పాక్ భూభాగంలోకి చొచ్చుకెళ్లి ఉగ్రవాద శిబిరాలను ధ్వంసం చేయడంతో దాయాది దేశం ప్రతీకారేచ్ఛతో రగిలిపోతోంది. తమ అస్తిత్వం చాటుకోవడానికి ప్రతిచర్యలకు దిగుతోంది. ఈ క్రమంలో పాక్ వాయు సేనకు చెందిన యుద్ధ విమానం ఒకటి సరిహద్దులు దాటి భారత భూభాగంలోకి ప్రవేశించింది. దీన్ని కూల్చివేసినట్లు భారత భద్రతా దళాలు వెల్లడించాయి. కశ్మీర్‌లోని నౌషెరా సమీపంలో భారత భూభాగంలోకి వచ్చిన పాక్‌ యుద్ధ విమానాన్ని వెంబడించి పాక్ పరిధిలోని లామ్‌ లోయలో కూల్చివేసినట్లు భారత అధికారులు తెలిపారు. పాక్ విమాన పైలట్‌ వివరాలు తెలియాల్సి ఉంది. అయితే.. పాక్ మాత్రం ఇదే అంశంపై మరో రకంగా స్పందిస్తోంది. భారత యుద్ధ విమానాలను కూల్చేశామని, ఓ పైలట్‌ను అదుపులోకి తీసుకున్నామని చెబుతోంది. భారత వాయు సేనకు చెందిన రెండు యుద్ధ విమానాలను కూల్చినట్లు పాకిస్థాన్‌ ఇంటర్‌ సర్వీస్‌ పబ్లిక్‌ రిలేషన్స్‌ డీజీ ఆసీఫ్‌ గఫూర్‌ తెలిపారు. పాక్‌ యుద్ధ విమానాలను వెంటాడుతూ నియంత్రణ రేఖను దాటిన రెండు యుద్ధ విమానాలను కూల్చివేసినట్లు ఆయన ట్విటర్‌ ద్వారా వెల్లడించారు. భారత వాయుసేనకు చెందిన ఒక విమానాన్ని పాక్‌ ఆక్రమిత కశ్మీర్‌లో కూల్చేయగా.. మరో విమానాన్ని కశ్మీర్‌లో కూల్చివేసినట్లు గఫూర్ తెలిపారు. దీంతోపాటు భారత వాయుసేనకు చెందిన ఒక పైలట్‌ను తమ అధికారులు అదుపులోకి తీసుకున్నట్లు వెల్లడించారు.‘పాక్ భూభాగంలోకి భారత యుద్ధ విమానాలు ప్రవేశించడాన్ని తీవ్రంగా ఖండిస్తున్నాం.. భారత్ చర్యలను తిప్పికొట్టే శక్తి, సామర్థ్యాలు పాకిస్థాన్‌కు ఉన్నాయని నిరూపించడానికి ప్రతిచర్యకు దిగాం’ అని గఫూర్ అన్నారు. భారత వాయుసేనకు చెందిన యుద్ధ విమానాలను కూల్చేసినట్లు పాక్ మీడియాలోనూ పెద్ద ఎత్తున వార్తా కథనాలు ప్రచురిస్తున్నారు. ఇందుకు సంబంధించి కొన్ని వీడియోలను కూడా ప్రదర్శిస్తున్నారు. ఈ విషయంలో పాక్‌ మీడియా అతిగా స్పందిస్తోంది. ఎప్పుడో జరిగిన ఘటన తాలూకు దృశ్యాలను పదేపదే చూపిస్తూ.. ప్రజలను తప్పుదోవ పట్టిస్తోంది. పాక్‌ సైన్యం.. భారత భూభాగంపై దాడులు జరిపిందని అసత్య ప్రచారం చేస్తోంది. గతంలో జోధ్‌పూర్‌లో కూలిన ఓ ఫైటర్‌ జెట్‌ దృశ్యాలను చూపిస్తూ సీన్ మరింత రక్తి కట్టిస్తోంది. పైగా భారత మీడియా విలువలు పాటించడం లేదంటూ విషం చిమ్ముతుండటం గమనార్హం. భారత అధికారులు మాత్రం ఈ వార్తల్లో ఎలాంటి నిజం లేదని ఖండిస్తున్నారు. పాక్ యుద్ధ విమానాలు భారత గగనతలంలోకి ప్రవేశించడానికి వచ్చాయని.. వాటిని సరిహద్దుకు సమీపంలోనే కూల్చివేశామని తెలిపారు. భారత వాయుసేనకు చెందిన పైలట్‌ను పాక్ అధికారులు అదుపులోకి తీసుకున్న వార్తలపై ఉన్నతాధికారులు స్పందించాల్సి ఉంది. అంతేకాకుండా పాక్ విమానాలను వెంబడిస్తూ భారత యుద్ధ విమానాలు ఆ దేశ భూభాగంలోకి వెళ్లిన విషయంపైనా స్పష్టత రావాల్సి ఉంది. భారత విదేశాంగ కార్యదర్శి బుధవారం మధ్యాహ్నం నిర్వహించే మీడియా సమావేశంలో దీనిపై వివరణ ఇచ్చే అవకాశం ఉంది.