టాలీవుడ్ దర్శకులకు ఇంతకు ముందు ఒక్క హిట్ పడితే చాలు.. ఆ సినిమా పేరు చెప్పుకుని వరుస సినిమాలను ఒప్పుకునేవారు. నిర్మాతలు కూడా కొత్త దర్శకులను పక్కన పెట్టేసి హిట్ ఇవ్వకపోతాడా అని మళ్లీ మళ్లీ ఆ దర్శకుడికే అవకాశం ఇచ్చేవారు. ఇప్పుడు ట్రెండ్ మారింది.. రికార్డులు చూసి జబ్బలు చరుచుకునే రోజులు పోయాయి. ఇంతకు ముందు పగిలిపోయే రికార్డులు సాధించినా ప్రజెంట్ హిట్ రాకపోతే రెండో ఆలోచన లేకుండా తీసి పక్కనపెట్టేస్తున్నారు. కొత్త దర్శకుల్ని లైన్‌లోకి తీసుకువస్తున్నారు. తాజాగా టాలీవుడ్ మాస్ అండ్ యాక్షన్ స్టార్ దర్శకుడు బోయపాటి శ్రీను ఇలాంటి పరిస్థితులనే ఎదుర్కొంటున్నారు. భద్ర, తులసి, సింహా, లెజెండ్, సరైనోడు, జయ జానకి నాయక లాంటి బ్లాక్ బస్టర్ హిట్ చిత్రాలతో టాలీవుడ్ మాస్ మసాలా యాక్షన్ దర్శకుడిగా అగ్రస్థానంలో కొనసాగిన బోయపాటి శ్రీను ఇమేజ్ ‘వినయ విధేయ రామ’ చిత్రంతో ఒక్కసారిగా డౌన్ అయ్యింది. భారీ అంచనాల నడుమ విడుదలైన ఈ మూవీ ఈ సంక్రాంతికి విడుదలై బిగ్గెస్ట్ డిజాస్టర్‌ అయ్యింది. సినిమా అన్నాక హిట్, ఫ్లాప్‌లు కామన్.. అయితే ‘వినయ విధేయ రామ’ చిత్రంలో బోయపాటి రూపొందించిన యాక్షన్ సన్నివేశాలు విపరీతంగా ట్రోల్ చేయబడ్డాయి. ట్రైన్, పాము సీన్లు అయితే.. అసలు బోయపాటి శ్రీనేనా వీటికి దర్శకత్వం వహించింది అన్నట్టుగా విపరీతమైన అతి చూపించి నెటిజన్లకు టార్గెట్ అయ్యారు. అయితే ఈ ప్రభావం బోయపాటి శ్రీను తరువాత ప్రాజెక్ట్‌లపై కూడా పడినట్టు తెలుస్తోంది. ఒకవైపు యంగ్ దర్శకులు హవా నడుస్తున్న సందర్భంలో నిన్న మొన్నటి వరకూ బోయపాటితో సినిమాలు చేసేందుకు ఆసక్తి చూపించిన నిర్మాతలు సడెన్‌గా సైడైపోతున్నారట. ఆసక్తికరమైన విషయం ఏంటంటే.. ఆయనతో సినిమా చేసేందుకు ముందుగా ఇచ్చిన అడ్వాన్సులను సైతం తిరిగి తీసుకుంటున్నారట.‘వినయ విధేయ రామ’ సెట్స్‌పై ఉన్నప్పుడే నందమూరి బాలక్రిష్ణతో పాటు మెగాస్టార్ చిరంజీవి, మైత్రీ మూవీ మేకర్స్‌‌తో వరుస సినిమాలను లైన్‌లో పెట్టారు బోయపాటి. అయితే మైత్రీ మూవీ మేకర్స్ బోయపాటితో డీల్‌ను క్యాన్సిల్ చేసుకున్నట్టు తెలుస్తోంది. అంతేకాదు ముందుగా ఇచ్చిన అడ్వాన్స్‌ని సైతం వెనక్కితీసుకున్నట్లు వార్తలు వస్తున్నాయి. అయితే తనపై వచ్చిన విమర్శలన్నింటికీ త్వరలో రాబోయే బాలక్రిష్ణ మూవీతో సమాధానం ఇవ్వడానికి కసితో పనిచేస్తున్నారట బోయపాటి. ఇప్పటికే బాలయ్య కాంబినేషన్‌లో ‘సింహా’, ‘లెజెండ్’ లాంటి బ్లాక్ బస్టర్ హిట్‌లు కొట్టిన బోయపాటి.. ఈసారి గట్టిగా కొట్టేందుకు రెడీ అయ్యారట. బాలయ్యతో కలిసి హ్యాట్రిక్ హిట్ కొట్టాలన్న బోయపాటి ఆశ తీరాలనే కోరుకుందాం.