మెగాస్టార్ చిరంజీవి తమ్ముడిగా ‘అక్కడ అమ్మాయి.. ఇక్కడ అబ్బాయి’తో సినీ రంగంలోకి అడుగుపెట్టారు పవన్ కళ్యాణ్. తన స్టైల్, యాక్టింగ్తో యూత్ను విశేషంగా ఆకట్టుకుని పవర్ స్టార్ అయిపోయారు. టాలీవుడ్లో అభిమానాన్ని భక్తి స్థాయికి తీసుకెళ్లిన వన్ అండ్ ఓన్లీ స్టార్ పవన్కళ్యాణ్. చాలామంది యూత్ హీరోలు తాము పవన్కళ్యాణ్ కు అభిమానులమని చెప్పుకోవడానికి గర్వపడుతుంటారు. హీరో నితిన్, నిర్మాత బండ్ల గణేష్ లాంటి వారైతే ఆయనకు అభిమానులం కాదు భక్తులమని చెబుతుంటారు. ప్రస్తుతం రాజకీయాల్లో బిజీగా మారిపోవడంతో పవన్ సినిమాలపై కన్నెత్తి కూడా చూడటం లేదు. రాజకీయ పర్యటనల పేరుతో ఆయన తమ ముందుకే వస్తున్నా.. సిల్వర్ స్క్రీన్ పై చూడలేకపోతున్నామన్న బాధ అందరిలోనూ ఉంది. కెరీర్ పీక్స్లో ఉన్న సమయంలోనే రాజకీయాల్లో మార్పు తెస్తానంటూ ‘జనసేన’ పార్టీ స్థాపించిన పవన్కళ్యాణ్ ఇక సినిమాలకు గుడ్ బై చెప్పేసినట్లేనని వార్తలు వినిపించాయి. ఆయన కూడా జోడు గుర్రాలపై స్వారీ చేయలేమన్న అభిప్రాయంలో పూర్తిగా రాజకీయాలకే పరిమితమైపోయారు. వచ్చే ఎన్నికల్లో ఎలాగైనా సత్తా చాటి ఏపీలో కీలకంగా మారాలని చాలా కష్టపడుతున్నారు. అయితే తాజాగా వినిపిస్తున్న వార్త మెగా అభిమానుల్లో జోష్ నింపుతోంది. ఎన్నికల తర్వాత పవన్ మళ్లీ మేకప్ వేసుకుంటారంటూ జోరుగా ప్రచారం జరుగుతోంది. ఇటీవల తన కుటుంబంలో జరిగిన హోమానికి పవన్ హాజరయ్యారట. అక్కడ చిరంజీవి, సురేఖ దంపతులు పవన్ తో సినిమా కెరీర్ గురించి చర్చించినట్లు తెలుస్తోంది. రాజకీయాల పేరుతో సినిమాలను పూర్తిగా పక్కనబెట్టడం మంచిది కాదని, అభిమానులకు అలరించేందుకు ఎన్నికల తర్వాత మళ్లీ సినిమాల్లో నటించాలని వారిద్దరూ పవన్ కు సూచించారట. మిగతా కుటుంబసభ్యులు కూడా పవన్ వద్ద అదే అభిప్రాయాన్ని వ్యక్తం చేసినట్లు తెలుస్తోంది. మెగా అభిమానులతో పాటు సినీ రంగంలో అత్యంత సన్నిహితులు కూడా నిర్ణయాన్ని మార్చుకోవాలని పవన్ కు సూచిస్తున్నారట. అయితే ఏపీ అసెంబ్లీ ఎన్నికల్లో సత్తా చాటాలన్నదే ప్రస్తుతం పవన్ ధ్యేయంగా కనిపిస్తోంది. ఎన్నికల ఫలితాలను బట్టి ఆయన నటిస్తారా? లేదా? అన్నది తెలుస్తుందని సన్నిహితులు చెబుతున్నారు. మైత్రీ మూవీస్ బ్యానర్లో సినిమా చేసేందుకు పవన్ చాలా నెలల క్రితమే సంతకం చేశారట. అయితే పార్టీ కార్యకలాపాల్లో పవన్ బిజీగా మారిపోవడంతో ఆ ప్రాజెక్ట్ పట్టాలెక్కలేదు. అయితే ఎన్నికల తర్వాత కచ్చితంగా పవన్ కచ్చితంగా ఆ బ్యానర్ లో  సినిమా చేస్తారని కొందరు చెబుతున్నారు. పవన్ నిజంగానే తిరిగి సిల్వర్ స్క్రీన్ పై సందడి చేస్తే మెగా అభిమానులకు అంతకంటే ఆనందం ఏముంటుంది.