విశాఖ జిల్లాలో శాసనసభ, పార్లమెంటు స్థానాల్లో పోటీకి నిలిచే అభ్యర్థుల ఎంపికపై ఏపీ ముఖ్యమంత్రి చంద్రబాబు నాయుడు అర్ధరాత్రి వరకూ సమీక్ష నిర్వహించారు. జిల్లాల్లోని మెజార్టీ అసెంబ్లీ సీట్లకు అభ్యర్థులను ఖరారుచేసిన సీఎం, ఎనిమిది మంది సిట్టింగ్‌లకు మరోసారి అవకాశం కల్పించారు. విశాఖ, అనకాపల్లి పార్లమెంటు నియోజకవర్గాల పరిధిలోని ఎమ్మెల్యేలు, ఇంఛార్జులతో ఉండవల్లిలోని ప్రజావేదికలో సమావేశాలు నిర్వహించారు. విశాఖపట్నం, అనకాపల్లి లోక్‌సభ అభ్యర్థులపై నిర్ణయం తీసుకోని చంద్రబాబు, విశాఖ పరిధిలోని నలుగురు సిట్టింగ్‌ ఎమ్మెల్యేలకు మళ్లీ టిక్కెట్‌లు ఖరారు చేశారు. విశాఖ తూర్పు- వెలగపూడి రామకృష్ణబాబు, విశాఖ దక్షిణ- వాసుపల్లి గణేష్‌కుమార్‌, విశాఖ పశ్చిమం- గణబాబు, గాజువాక- పల్లా శ్రీనివాసరావులకు కేటాయించారు. భీమిలి, విశాఖ ఉత్తరంపై మాత్రం ఎలాంటి నిర్ణయం తీసుకోలేదు. భీమిలి నుంచి మంత్రి లోకేష్‌‌ను పోటీలో నిలపాలని భావిస్తుండగా, అక్కడ సిట్టింగ్‌ ఎమ్మెల్యే, మంత్రి గంటా విశాఖ ఉత్తరం నుంచి పోటీ చేసే అవకాశం ఉంది. గత ఎన్నికల్లో పొత్తులో భాగంగా విశాఖ ఉత్తరం బీజేపీకి కేటాయించడంతో విష్ణుకుమార్‌రాజు విజయం సాధించారు. ప్రస్తుతం ఆ టిక్కెట్‌ కోసం టీడీపీ నుంచి భారీగా పోటీపడుతున్నారు. ఒకవేళ గంటా ఇక్కడ నుంచి కాకుండా వేరే నియోజకవర్గంలో బరిలోకి దిగాలని భావిస్తే మరొకర్ని ఎంపిక చేసే అవకాశం ఉంది. విశాఖ ఎంపీ పరిధిలోకి వచ్చే విజయగరం జిల్లాలోని ఎస్‌.కోట నియోజకవర్గం నుంచి సిట్టింగ్ ఎమ్మెల్యే కోళ్ల లలిత కుమారికే మళ్లీ టిక్కెట్‌ ఇచ్చే అవకాశం ఉంది.ఇక, అనకాపల్లి లోక్‌సభ పరిధిలోని పెందుర్తి- బండారు సత్యనారాయణమూర్తి, నర్సీపట్నం- మంత్రి అయ్యన్నపాత్రుడు, యలమంచిలి- పంచకర్ల రమేష్‌బాబు, చోడవరం- కేఎస్‌ఎన్‌ఎస్‌ రాజు పేర్లను చంద్రబాబు ఖరారు చేశారు. అనకాపల్లి నుంచి పీలా గోవిందు సత్యనారాయణ ప్రాతినిథ్యం వహిస్తుండగా మరోసారి ఆయనకే టిక్కెట్‌ ఖాయం చేస్తారని పార్టీ వర్గాలు పేర్కొన్నాయి. ఇక, పాయకరావుపేటలో సిట్టింగ్‌ ఎమ్మెల్యే వంగలపూడి అనిత, జిల్లా ఎస్సీ సెల్‌ అధ్యక్షుడు పి.విజయబాబు కూడా టిక్కెట్‌ కోరుతున్నారు.  గత ఎన్నికల్లో పోటీ చేసి ఓడిపోయిన రామానాయుడు సహా పైలా ప్రసాదరావు, పీఎస్‌ నాయుడు తదితరులు ఉన్నారు. కాగా, మంత్రి అయ్యన్నపాత్రుడు తన ఆరోగ్య కారణాల దృష్ట్యా ఈసారి పోటీ చేయబోనని ముఖ్యమంత్రికి తెలిపారు. తన కుమారుడు విజయ్‌కి అనకాపల్లి లోక్‌సభ టిక్కెట్‌ ఇవ్వాలని కోరారు. అయితే, దీనికి అంగీకరించని చంద్రబాబు, నర్సీపట్నం నుంచి అయ్యన్నపాత్రుడే మళ్లీ పోటీ చేయాలని స్పష్టంచేశారు.