ఎన్నికల నగారా మోగడంతో ఇప్పటికే అభ్యర్థుల ఎంపిక దాదాపు ఖరారుచేసిన టీడీపీ అధినేత చంద్రబాబు తొలి జాబితాను గురువారం అర్ధరాత్రి ప్రకటించిన విషయం తెలిసిందే. ఇందులో 126 మంది అభ్యర్థుల పేర్లను ప్రకటించగా, వారసులతో కలిపి 83 మంది సిట్టింగులు మరోసారి తమ అదృష్ట‌ాన్ని పరీక్షించుకోనున్నారు. తొలి విడతలో 15 మంది మహిళలకు చంద్రబాబు అవకాశం కల్పించారు. అయితే, చాలా చోట్ల వారసులకు సీట్లు కేటాయించారు. సీనియర్ నేతల కోరిక మేరకు వారి వారసులను బరిలోకి దింపారు. వయసు, ఆరోగ్యం, వ్యక్తిగత కారణాలతో ఈసారి తమ వారసులకు టిక్కెట్లు ఇవ్వాలంటూ పలువురు నేతలు విజ్ఞ‌ప్తి చేయడంతో పరిగణనలోకి తీసుకున్న బాబు యువకులకు అవకాశం కల్పించారు. డిప్యూటీ సీఎం కేఈ కృష్ణమూర్తి కుమారుడు కేఈ శ్యాంబాబు, మంత్రి పరిటాల సునీత శ్రీరాం, మాజీ మంత్రి బొజ్జల గోపాలకృష్ణారెడ్డి తనయుడు సుధీర్‌రెడ్డి, పలాస ఎమ్మెల్యే గౌతు శ్యాంసుందర శివాజీ కుమార్తె శిరీష, జలీల్‌ఖాన్‌ కుమార్తె షబానా ఖాతూన్‌, మావోయిస్టుల కాల్పుల్లో మరణించిన ఎమ్మెల్యే కిడారి సర్వేశ్వరరావు కుమారుడు, మంత్రి కిడారి శ్రావణ్‌కుమార్‌, దివంగత గాలి ముద్దుకృష్ణమ నాయుడు తనయుడు భానుప్రకాష్‌ మాజీ మంత్రి కిమిడి మృణాళినికుమారుడు నాగార్జున, దివంగత దేవినేని నెహ్రూ కుమారుడు అవినాష్‌, దివంగత ఎర్రన్నాయుడు కుమార్తె భవానిలకు ప్రస్తుతం సీట్లను కేటాయించారు. మరోవైపు, పోటీ తీవ్రంగా ఉన్న సీట్లు, ఏకాభిప్రాయం కుదరని నియోజకవర్గాలు, ఎంపీ స్థానాల ఎంపికతో ముడిపడిన నియోజకవర్గాలకు అభ్యర్థుల ప్రకటన వాయిదా వేశారు. తొలి విడతలో 126 నియోజకవర్గాలకు అభ్యర్థుల్ని ప్రకటించడంతో ఇక 49 స్థానాలే మిగిలాయి. 

పత్తికొండ- కేఈ శ్యాంబాబు, 

రాప్తాడు-పరిటాల శ్రీరాం 

శ్రీకాళహస్తి- సుధీర్ రెడ్డి,

పలాస-గౌతు శిరీష 

విజయవాడ (వెస్ట్)- షబానా ఖాతూన్ 

అరకు- కిడారి శ్రావణ్ 

చీపురపల్లి- నాగార్జున 

గుడివాడ- దేవినేని అవినాశ్ 

రాజమండి- ఆదిరెడ్డి భవాని 

ఇక మొదటి జాబితాలో పదిమంది వారసులకు చోటు దక్కగా... రెండో జాబితాలోనూ పలువురు వారసుల పేర్లు ఉండే అవకాశాలు కనిపిస్తున్నాయి. తాడిపత్రి నుంచి జేసీ ప్రభాకర్ రెడ్డి తనయుడు అస్మిత్ రెడ్డి పోటీ చేయడం దాదాపుగా ఖాయమైంది.