తెలంగాణ ముఖ్యమంత్రి కేసీఆర్ పై సీఎం చంద్రబాబు నిప్పులు చెరిగారు. ‘‘కేసీఆర్ నాకు ఒక బర్త్డే గిఫ్ట్ ఇస్తే.. నేను 10 బర్త్ డే గిఫ్ట్లు ఇస్తా’’ అని హెచ్చరించారు. మంగళవారం అనంతలో ఎన్నికల ప్రచారంలో పాల్గొన్న చంద్రబాబు.. జగన్, కేసీఆర్, మోదీపై తీవ్రస్థాయిలో ధ్వజమెత్తారు. కేసీఆర్ పంపించే డబ్బులకు ఏపీలో ఓట్లు రావని అన్నారు. ఏం చేశాడని జగన్కు 22 ఎంపీ సీట్లు వస్తాయని ప్రశ్నించారు. జగన్ను కేసీఆర్ పావుగా ఉపయోగించుకుంటున్నారని దుయ్యబట్టారు. 16 సీట్లు ఇస్తే చక్రం తిప్పుతానని అన్న కేసీఆర్ మాటలను ఉటంకించిన చంద్రబాబు.. తెలంగాణలో ఏమాత్రం అభివృద్ధి చేయని కేసీఆర్ 16 ఎంపీ సీట్లు గెలిస్తే.. ఏపీకి ఎంతో చేసిన టీడీపీ ఎన్ని సీట్లు గెలవాలని అని అన్నారు. ఏపీలో టీడీపీ మళ్లీ గెలవడం చారిత్రక అవసరం అని చంద్రబాబు పేర్కొన్నారు. ఏ అధికారంతో పోవలరంపై కేసీఆర్ కోర్టులో కేసులేస్తున్నారని చంద్రబాబు మండిపడ్డారు. జగన్, మోదీ, కేసీఆర్కు రాష్ట్రం బాగుపడటం ఇష్టం లేదన్నారు. అభివృద్ధి సగంలో ఆగిపోవడానికి వీళ్లేదని, కుట్రలకు పాల్పడుతున్న వైసీపీకి డిపాజిట్లు రాకుండా చేయాలని చంద్రబాబు పిలుపునిచ్చారు.

జగన్కు నీతి నిజాయితీ లేదు..

ప్రతిపక్ష నేత వైఎస్ జగన్ కు నీతి, నిజాయితీ లేదని, పద్ధతి తెలవదవి సీఎం చంద్రబాబు విమర్శించారు. జగన్ కు ఓటేస్తే అవినీతి పెరుగుతుందని, అభివృద్ధి ఆగిపోతుందని అన్నారు. తండ్రి అధికారాన్ని అడ్డుపెట్టుకొని భారీ ఎత్తున దోచుకున్నారని ఆరోపించారు. జగన్ వల్ల అనేక మంది అధికారులు జైలుపాలయ్యారని చెప్పారు. ఏపీ ఎన్నికలతో తమకు సంబంధంలేదని కేటీఆర్ అంటున్నారని, మరి ఏపీకి డబ్బులు పంపడం అవసరమా? అని చంద్రబాబు ప్రశ్నించారు. టీడీపీ డేటాను దింగిలించి వైసీసీకి ఇచ్చి తమ పార్టీని నిర్వీర్యం చేయాలని టీఆర్ఎస్ చూస్తోందని మండిపడ్డారు.