జగనన్నకు తోడుగా మేము సైతం అంటున్నారు సినీ నటులు. ఏపీ ఎన్నికల్లో వైసీపీ కోసం ప్రచారం ప్రారంభించారు. పార్టీ అభ్యర్థుల గెలుపు కోసం జిల్లాలన్నీ చుట్టేస్తున్నారు. జగన్‌ను సీఎం చేయాలంటూ ప్రచారంలో దూకుడు పెంచారు. కమెడియన్ అలీ, హీరో తనీష్ రాయలసీమ జిల్లాల్లో పర్యటిస్తున్నారు. రెండు రోజులుగా నియోజకవర్గాలవారీగా పర్యటిస్తూ.. వైసీపీ అభ్యర్థుల గెలుపు కోసం ప్రచారం చేస్తున్నా రు.అలీ, తనీ‌ష్‌లు ఉదయం ప్రచారం ప్రారంభించి.. అర్థరాత్రి వరకు వైసీపీ అభ్యర్థుల గెలుపు కోసం పని చేస్తున్నారు. అలీ, తనీష్ ప్రచారంలో ఏం తాత వ్యవసాయం ఎలా ఉంది.. ఏం బామ్మ బాగున్నావా అంటూ ఓటర్లను ఆప్యాయంగా పలకరిస్తున్నారు. సినిమా పంచ్‌లు, జోక్‌లతో ఓటర్లను ఆకట్టుకునే ప్రయత్నం చేస్తున్నారు. అలీ, తనీష్‌లకు తోడు థర్టీ ఇయర్స్ ఇండస్ట్రీ పృథ్వీ కూడా ప్రచారంలో బిజీ అయ్యారు. అలీ, తనీష్‌లు ఇటీవలే వైసీపీలో చేరారు. అలీ వైసీపీ నుంచి పోటీ చేస్తారని భావించినా.. తాను ప్రచారం వరకే పరిమితమవుతానని ప్రకటించారు. చెప్పినట్లే వైసీపీ అభ్యర్థుల కోసం ప్రచారంలోకి దిగారు. మరి సినీ గ్లామర్ ఓటర్లను ఏమాత్రం ఆకట్టుకుంటుందో.. ఎంత వరకు ఓట్లు రాలుస్తుందో చూడాలి.