టీడీపీ అధినేత, ఏపీ సీఎం చంద్రబాబు తనయుడు, మంగళగిరి అభ్యర్థి నారా లోకేశ్.. ఏ క్షణాన నోరు జారారో గానీ.. నెటిజన్లు సెటైర్ల వర్షం కురిపిస్తున్నారు. ఏపీ ఎన్నికలను రసవత్తరంగా మారుస్తున్న లోకేశ్ కామెంట్లు.. ఇటు తెలంగాణలోనూ చర్చనీయాంశంగా మారాయి. తాజాగా లోకేశ్ చేసిన వ్యాఖ్యలకు పరోక్షంగా సెటైర్ వేస్తూ ఓ నెటిజన్ చేసిన కామెంట్ నెట్టింట్లో హాట్ టాపిక్‌గా మారింది. టీఆర్‌ఎస్ వర్కింగ్ ప్రెసిడెంట్ కేటీఆర్‌ను ట్యాగ్ చేస్తూ ఓ నెటిజన్ ఇలా పోస్టు చేశాడు.. ‘ఎంపీ ఎన్నికల్లో టీఆర్‌ఎస్ పార్టీకి ఓటేయొద్దని నేను నిర్ణయం తీసుకున్నా.. ఎందుకంటే మచిలీపట్నం పోర్టును తెలంగాణకు తీసుకురావడంలో కేసీఆర్, కేటీఆర్ విఫలమయ్యారు’ అని ట్వీట్ చేశాడు. కేటీఆర్ నవ్వుతూ ఉన్న ఎమోజీలతో దీన్ని రీట్వీట్ చేశారు.కొంత మంది నెటిజన్లు ఈ ట్వీట్‌కు ఆసక్తికర కామెంట్లు పెడుతున్నారు. ‘కేటీఆర్ సార్.. ఆ మచిలీపట్నం పోర్టుతో పాటు తిరుమల కొండను కూడా తెలంగాణకు తీసుకురండి సార్.. రైలు టికెట్లు దొరకట్లేదు’ అంటూ ఓ నెటిజన్ కామెంట్ పెట్టాడు.‘కేసీఆర్ బంగాళాఖాతాన్ని తెలంగాణకు తరలించుకుపోతుంటే మా లోకేశ్ బాబు చూస్తూ ఊరుకుంటారా.. ట్యాంక్‌బండ్, గోల్కోండ, చార్మినార్‌ను ఆంధ్రాకు లాక్కెళ్లిపోతారు’ అంటూ మరో నెటిజన్ కామెంట్ చేశాడు. నారా లోకేశ్ వ్యాఖ్యలు విన్నాక నవ్వు ఆపుకోలేకపోయా అంటూ మరికొంత మంది కామెంట్లు పెట్టారు.మంగళగిరి నియోజకవర్గంలో ఎన్నికల ప్రచారంలో పాల్గొన్న నారా లోకేశ్.. టీఆర్‌ఎస్ పార్టీతో పాటు కేసీఆర్‌పై తనదైన శైలిలో విమర్శలు కురిపించారు. వైఎస్ జగన్‌తో కలిసి ఆంధ్రాను ఆగం చేయడానికి కేసీఆర్ చూస్తున్నారని ఆరోపించారు. ఏపీ అభివృద్ధికి పదే పదే అడ్డు తగులుతున్నారని మండిపడ్డారు. పోలవరం ప్రాజెక్టును అడ్డుకునే ప్రయత్నం చేశారని ఆరోపించిన నారా లోకేశ్.. మరో అడుగు ముందుకేసి మచిలీపట్నం పోర్టును తెలంగాణకు తీసుకెళ్లడానికి ప్రయత్నించారనడం గమనార్హం