కర్నూలు జిల్లాలో ఘోర రోడ్డు ప్రమాదం చోటుచేసుకుంది. కాలినడకన శ్రీశైలం వెళుతున్న శివ భక్తులపైకి ఒక లారీ దూసుకెళ్లింది. ఈ ప్రమాదంలో ముగ్గురు అక్కడికక్కడే మృతిచెందారు.  బుధవారం ఉదయం ఈ ఘటన జరిగింది. . బళ్లారి జిల్లా ఎర్రగుడి గ్రామానికి చెందిన 42 మంది భక్తులు ఉగాది సందర్భంగా స్వగ్రామం నుంచి కాలినడకన శ్రీశైలం బయలుదేరారు. దేవనకొండ మండలం కప్పట్రాళ్ల సమీపంలో  ఉదయం 6గంటల సమయంలో ఓ లారీ 8 మంది పాదచారులపైకి దూసుకెళ్లింది. ఈ ఘటనలో ఉలిగయ్య(30), పోతులింగ(23), షేకు(16) అక్కడికక్కడే మృతి చెందారు. దేవేందర్ రెడ్డి, పోతప్ప, గాదెలింగ, నాగరాజు తీవ్రంగా గాయపడ్డారు. క్షతగాత్రులను 108 వాహనంలో కర్నూలు ప్రభుత్వ ఆస్పత్రికి తరలించారు. గాయపడ్డవారిలో దేవేందర్రెడ్డి, పోతప్ప పరిస్థితి విషమంగా ఉన్నట్లు వైద్యులు తెలిపారు.. అదే లారీ కప్పట్రాళ్ల స్టేజ్ వద్ద మరో ఇద్దరు పాదచారులపైకి దూసుకెళ్లడంతో వారు కూడా గాయపడ్డారు.