ఈ పచ్చని పొలాలు ఎప్పుడూ ఇలా శాశ్వతంగా ఉండాలంటే.. ఈ పసుపు జెండా ఎప్పుడూ ఇలా ఎగురుతూ ఉండాలి. చంద్రన్నా.. ఈ పొలానికి నీళ్లెంత అవసరమో.. రాష్ట్రానికి చంద్రబాబు అంతే అవసరం.. నీ వెనుకే ఉంటాం.. నిన్నే గెలిపించుకుంటాం. చంద్రన్నకు ఓటేయడం మన రుణం కాదు మన బాధ్యత’’.. ఈ భారీ డైలాగ్‌లు, ఎమోషన్స్‌ని పిండేస్తున్న సీన్లు చేస్తుంటే బోయపాటి శ్రీను గుర్తుకురావాల్సిందే. గుర్తుకురావడం ఏంటి బోయపాటి శ్రీను దర్శకత్వంలోని మచ్చుతునకలే ఇవి. 

ఒరేయ్ శివుడూ.. మన ఊరికి నీళ్లొచ్చినాయిరా.. సీమలో నీళ్లు చూస్తానని నేను అనుకోలేదురా అంటూ ఆనందంతో ఉప్పొంగిపోయిన ఓ తండ్రి పట్నంలో తన కొడుక్కి వీడియో కాల్ ద్వారా సమాచారం అందించడం.. మా ఊరికి నీళ్లొచ్చాయిరా.. చూడరా చూడరా అంటూ తన ఆనందాన్ని తన ఫ్రెండ్స్‌తో ఆ యువకుడు చెప్పడం.. పక్కనే ఉన్న మరో యువకుడు అదంతా గ్రాఫిక్స్ అని అంటే.. కోపంతో ఊగిపోయిన సీమ యువకుడు చెంప చెల్లుమనిపించి.. ‘మీ కళ్లు ముందు కడుతున్న రాజధాని గ్రాఫిక్స్.. పోలవరం గ్రాఫిక్స్.. పారుతున్న నీళ్లు కూడా గ్రాఫిక్సేనరా అంటూ నీళ్లన్న చోట కన్నీరుండదని నమ్మిన మనిషిరా చంద్రబాబు.. అలాంటి మంచి మనిషికి ఓటేసి నిలబెట్టుకోవడం మన బాధ్యత’ అంటూ భారీ డైలాగ్ చెప్తుంటే బ్యాగ్రౌండ్‌లో వినయవిధేయ రామ మ్యూజిక్ రావడం ఇదంతా బోయపాటి వారి దర్శకత్వ ప్రతిభే. గోదావరి పుష్కరాలు మొదలు టీడీపీ ప్రమోషన్స్ బాధ్యతల్ని మోస్తూనే ఉన్నారు దర్శకుడు బోయపాటి శ్రీను. తాజాగా 2019 ఎన్నికలకు తెలుగుదేశం పార్టీకి ఆయన డైరెక్షన్‌లో వచ్చిన యాడ్స్ సోషల్ మీడియాతో పాటు ఎలక్ట్రానిక్ మీడియాలోనూ వీర కుమ్ముడు కుమ్మేస్తున్నాయి. సెంటిమెంట్, ఎమోషన్స్, యాక్షన్ ఇలా అన్ని ఎలిమెంట్స్‌ను సమపాళ్లలో ఇంకా చెప్పాలంటే.. రెండుపాళ్లు ఎక్కువే కలిపి ఓటర్లకు ఎమోషనల్‌గా టీడీపీని చేరువ చేసేందుకు బోయపాటి తన దర్శకత్వ ప్రతిభను మొత్తం వాడేస్తున్నారు. టేకింగ్ పరంగా సినిమా రేంజ్‌కి ఏమాత్రం తగ్గకుంటా ఏరియల్ షాట్స్‌‌తో పాటు బ్యాగ్రౌండ్ మ్యూజిక్‌ సన్నివేశాలకు తగ్గట్టు పిండేస్తున్నారు. అయితే ఈ యాడ్స్‌పై ఓటర్ల నుండి భిన్నాభిప్రాయాలు వస్తున్నాయి. టీడీపీని సపోర్ట్ చేసేవాళ్లు ఆహా.. ఓహో అంటుంటే.. ఎప్పటిలాగే యాంటీ ఫ్యాన్స్ ట్రోల్స్ చేస్తున్నారు.