తిరుమల శ్రీభూ వ‌రాహ‌స్వామి ఆలయంలో ఏప్రిల్ 23 నుంచి 27 వరకు ఐదు రోజుల పాటు అష్టబంధన బాలాలయ మహాసంప్రోక్షణ నిర్వహించనున్నట్టు టీటీడీ ప్రకటించింది. వైఖానస ఆగమనం పాటించే అన్ని వైష్ణవాలయాల్లో లోక కల్యాణం కోసం 12 ఏళ్లకు ఒకసారి ఈ వైదిక కార్యక్రమం నిర్వహిస్తారు. ఈ కార్యక్రమానికి ఏప్రిల్ 22న రాత్రి అంకురార్పణం నిర్వహిస్తారు. తిరుమలలో తొలి దైవం శ్రీ ఆదివరాహస్వామి. ఈయన్నే ‘శ్వేత వరాహస్వామి’ అంటారు. క్షేత్రసంప్రదాయం ప్రకారం ‘తొలి పూజ, తొలి నైవేద్యం, తొలిదర్శనం’ జరుగుతున్న ఈ వరాహస్వామి దర్శనం తర్వాతే శ్రీవారిని దర్శించుకోవాలి. శ్రీమహావిష్ణువు లోక కల్యాణం కోసం వరాహస్వామిగా అవతరించి హిరణ్యాక్షుని సంహరించి భూదేవిని రక్షించినట్లు పురాణాలు తెలియజేస్తున్నాయి. సాధారణంగా ఆలయంలోని మూలవిరాట్టు, పరివార దేవతల విగ్రహాల పాదాల కింద ఉన్న పద్మపీఠానికి మధ్యలో అష్టబంధన లేపనం పూసి అతికించబడి ఉంటాయి. దీని వల్ల విగ్రహాలు కదలకుండా ఉంటాయి. ఆలయంలో రోజూ జరిగే కైంకర్యాలు, అభిషేకాలు, ధూపదీపాలతో జనించే వేడి మొదలైన వాటివల్ల కాలక్రమంలో అష్టబంధనం ఊడి విగ్రహాలు కదులుతాయి. ఇందులో భాగంగా గ‌ర్భాల‌యాలలో జీర్ణోద్ధరణ (ఆధునీకరణ పనులు) కోసం ‘బాలాలయం’ చేపడతారు. ఇందుకోసం ఏప్రిల్ 22న సోమ‌వారం రాత్రి 7.30 నుంచి 9.30 వరకు సేనాధిపతి ఉత్సవం నిర్వహిస్తారు. అనంతరం వసంతమండపం వద్ద పుట్టమన్ను సేకరించి యాగశాలలో శాస్త్రోక్తంగా అంకురార్పణ ఘట్టం చేపడతారు. ఏప్రిల్ 23న ఉదయం 7.00 నుంచి 10.00 గంటల వ‌ర‌కు యాగ‌శాల‌లో వైదిక కార్య‌క్ర‌మాలు నిర్వ‌హిస్తారు. రాత్రి 8.00 నుంచి 10.00 గంటల వ‌ర‌కు కళాకర్షణలో భాగంగా గర్భాలయంలోని దేవతామూర్తుల శక్తిని కుంభం(కలశం)లోకి ఆవాహన చేస్తారు. ఈ కుంభాలతోపాటు ఉత్సవమూర్తులను యాగశాలలోకి వేంచేపు చేస్తారు. ఏప్రిల్ 24, 25 తేదీల‌లో ఉద‌యం, సాయంత్రం విశేషహోమాలు, యాగ‌శాల‌లో వైదిక కార్య‌క్ర‌మాలు జరుగుతాయి. ఏప్రిల్ 26న ఉద‌యం యాగ‌శాల‌లో వైదిక కార్య‌క్ర‌మాలు, మ‌ధ్యాహ్నం శ్రీ వ‌రాహ‌స్వామికి మ‌హాశాంతి పూర్ణాహుతి, తిరుమంజ‌నం నిర్వ‌హిస్తారు. రాత్రికి యాగ‌శాల‌లో వైదిక కార్య‌క్ర‌మాల‌లో భాగంగా శ‌య‌నాధివాసం నిర్వహించనున్నారు. ఏప్రిల్ 27న ఉదయం మహాపూర్ణాహుతి, మహాసంప్రోక్షణం వైఖానస ఆగమం ప్రకారం నిర్వహించి, రాత్రికి వ‌రాహ‌స్వామిని తిరు మాడ వీధులలో ఊరేగిస్తారు.