యువ్ న్యూస్ స్పోర్ట్స్ బ్యూరో:

ఆఖరి బంతి వరకు విజయం దోబూచులాడిన మ్యాచ్‌లో చివరకు ముంబై ఇండియన్స్‌ గట్టెక్కింది. ఏబీ డివిల్లీర్స్‌ (41 బంతుల్లో 4 ఫోర్లు, 6 సిక్సర్లతో 70 నాటౌట్‌) తుది వరకు పోరాడినా రాయల్‌ చాలెంజర్స్‌ బెంగళూరు 6 పరుగుల తేడాతో ఓడింది. గురువారం జరిగిన ఈ మ్యాచ్‌లో ముందుగా బ్యాటింగ్‌కు దిగిన ముంబై ఇండియన్స్‌ 20 ఓవర్లలో 8 వికెట్లకు 187 పరుగులు చేసింది. రోహిత్‌ (33 బంతుల్లో 8 ఫోర్లు, 1 సిక్స్‌తో 48), సూర్యకుమార్‌ యాదవ్‌ (24 బంతుల్లో 4 ఫోర్లు, 1 సిక్స్‌తో 38) ఆకట్టుకోగా హార్దిక్‌ పాండ్యా (14 బంతుల్లో 2 ఫోర్లు, 3 సిక్సర్లతో 32 నాటౌట్‌), యువరాజ్‌ సింగ్‌ (12 బంతుల్లో 3 సిక్సర్లతో 23) తుఫాన్‌ ఇన్నింగ్స్‌తో అలరించారు. చాహల్‌కు నాలుగు వికెట్లు దక్కాయి. ఆ తర్వాత లక్ష్యం కోసం బరిలోకి దిగిన బెంగళూరు 20 ఓవర్లలో 5 వికెట్లకు 181 పరుగులు చేసి ఓడింది. విరాట్‌ కోహ్లీ (32 బంతుల్లో 4 ఫోర్లతో 46) రాణించాడు. మ్యాన్‌ ఆఫ్‌ ద మ్యాచ్‌ బుమ్రా మూడు వికెట్లు తీశాడు.