జగన్ కు ఒక్క అవకాశం ఇవ్వాలని, ఎన్నికల్లో వైసీపీని గెలిపించి జగన్ను ముఖ్యమంత్రిన చేయాలని ఆ పార్టీ గౌరవ అధ్యక్షురాలు విజయమ్మ ప్రజలను కోరారు. శుక్రవారం నుంచి ప్రచారానికి సిద్ధమైన విజయమ్మ ముందుగా ఇడుపులపాయలోని వైఎస్ ఘాట్ వద్ద నివాళులు అర్పించారు. క్రైస్తవ పద్దతిలో ప్రత్యేక ప్రార్థనలు నిర్వహించారు. అనంతరం ఆమె మాట్లాడుతూ.. రాజన్న పాలన కావాలంటే జగన్ ముఖ్యమంత్రి కావాలని అన్నారు. విలువలకు, విశ్వసనీయతకు పట్టం కట్టి జగన్కు ఒక్కసారి అవకాశమివ్వాలని కోరారు.రాజశేఖరరెడ్డి పాలనను ఒక్కసారి గుర్తు తెచ్చుకోవాలని ప్రతి ఒక్కరిని కోరుకుంటున్నాను. రాజశేఖరరెడ్డి పాలనను చూసి ఈ రోజు ఉన్న పాలను చూస్తే చాలా బాధగా ఉందని ఆమె అన్నారు. తొమ్మిది సంవత్సరాలు నా బిడ్డ మీతో ఉన్నాడు మాతో కూడా లేడు అని అన్నారు. జగన్ చేసిన పాదయాత్ర అయితేనేమీ ఓదార్పు యాత్ర అయితేనేమీ తన దృష్టికి వచ్చిన ప్రతి అంశాన్ని విన్నాడు చూశాడు ఈ రోజు భరోసా ఇస్తున్నాడని ఆమె అన్నారు. రాజశేఖరరెడ్డి ఏ విధంగా భరోసా ఇచ్చాడో జగన్ కూడా అదే విధంగా భరోసా ఇస్తాడని మీ అందరికీ నేను మాట ఇస్తున్నానని అన్నారు. ప్రతి ఒక్క వైకాపా అభ్యర్థిని గెలిపించాలని కోరారు. చంద్రబాబు.. జగన్ను విమర్శించడమే పనిగా పెట్టుకున్నారని అన్నారు. ప్రజల్లో జగన్కు మంచి ఆదరణ ఉందని, జగన్ ముఖ్యమంత్రి కావడం తథ్యమని విజయమ్మ ధీమా వ్యక్తం చేశారు.