ఐఐటీ ఎంట్రన్స్‌లో ఫెయిలైన ఆ యువకుడిని అదృష్టం వరించింది. లండన్‌లోని గూగుల్ ఆఫీస్‌లో రూ.1.2 కోట్ల జీతంతో ఉద్యోగం లభించింది. ముంబయిలోని ఎల్.ఆర్. తివారీ ఇంజినీరింగ్ కాలేజ్‌లో బీఈ (కంప్యూటర్ సైన్స్) ఫైనల్ ఇయర్ చదువుతున్న అబ్దుల్లా ఖాన్(21) గూగుల్‌లోని కాంపెటిటీవ్ ప్రోగ్రామింగ్ చాలెంజస్‌ తన ప్రొఫైల్ పెట్టాడు. అతని ప్రొఫెల్‌ను ఎంపిక చేసిన గూగుల్.. ఆన్‌లైన్ ద్వారా అతన్ని ఇంటర్వ్యూ చేసింది. అనంతరం లండన్‌లో తుది దశ ఎంపిక ప్రక్రియ కోసం అతన్ని లండన్‌కు ఆహ్వానించింది. ఈ సందర్భంగా గూగుల్ అతనికి భారీ ఆఫర్‌ ఇచ్చింది. ఏడాదికి రూ.54.5 లక్షలు జీతంతోపాటు నాలుగేళ్లపాటు 15 శాతం బోనస్‌తో మరో రూ.58.9 లక్షలు చెల్లిస్తామని పేర్కొంది. ఖాన్ సెప్టెంబరు నుంచి గూగూల్‌లోని రిలయబిలిటీ ఇంజినీరింగ్ టీమ్‌లో విధులు నిర్వహించనున్నాడు. ఈ సందర్భంగా ఖాన్ మాట్లాడుతూ.. ‘‘నేను సరదాగా ప్రోగ్రామింగ్ ఛాలెంజస్‌లో నా ఫ్రొఫైల్ పెట్టాను. ఆ సైట్లో ప్రోగ్రామర్స్ ప్రొఫైల్స్‌ను చెక్ చేస్తారనే విషయం నాకు తెలియదు. నేను ఎంపికైనట్లు గూగుల్ నుంచి మెయిల్‌ రాగానే.. గతంలో అలాంటి మెయిల్స్ పొందిన నా స్నేహితుడికి దాన్ని చూపించాను. అతను అది నిజమే అని చెప్పడంతో ఆశ్చర్యపోయాను. త్వరలోనే గూగుల్‌లో జాయిన్ అవుతాను. ఇంకా ఎన్నో కొత్త విషయాలను నేర్చుకునేందుకు ఇదో గొప్ప అవకాశం’’ అని తెలిపాడు. ఖాన్ ఏడో తరగతి వరకు సౌదీ అరేబియాలో చదువుకున్నాడు. అతని కుటుంబం ఇండియాకు వచ్చేయడంతో ముంబయిలో చదువు కొనసాగించాడు.