సినీ నటుడు, హిందూపురం టీడీపీ ఎమ్మెల్యే నందమూరి బాలకృష్ణ మరోసారి రెచ్చిపోయారు. ఈసారి సొంత కార్యకర్తపైనే విరుచుకుపడ్డారు. ఎన్నికల ప్రచార సభలో కార్యకర్తతో దురుసుగా ప్రవర్తించారు. అందరూ చూస్తుండగానే హంగామా సృష్టించారు. ఇంతకీ ఆ కార్యకర్త చేసిన తప్పేంటంటే.. తన ప్రాంతంలోని ఓ చెరువుకు నీళ్లు ఇవ్వాలని కోరడమే. 

ఎన్నికలకు సమయం దగ్గర పడుతుండటంతో హిందూపురంలో బాలకృష్ణ ప్రచారాన్ని ముమ్మరం చేశారు. ఈ క్రమంలో శనివారం (మార్చి 30) హిందూపురం సమీపంలోని సిరివరం గ్రామానికి వెళ్లారు. గ్రామంలో ఏర్పాటు చేసిన సమావేశంలో పాల్గొన్నారు. ఈ సందర్భంగా ఆయన మాట్లాడుతుండగా టీడీపీ కార్యకర్త రవికుమార్ సిరివరం చెరువుకు నీరు విడుదల చేయాలని కోరాడు. దీంతో బాలకృష్ణ ఆగ్రహంతో ఊగిపోయారు. రవికుమార్‌ను తోసేశారు. టీడీపీ కార్యకర్త రవికుమార్‌ను కొట్టినంత పనిచేసిన బాలకృష్ణ.. అతణ్ని బయటకు పంపాలని పోలీసులను ఆదేశించారు. బాలకృష్ణ ఆదేశాలతో రవికుమార్‌ను పోలీసులు బయటకి పంపించారు. ఈ పరిణామంతో మనస్తాపానికి గురైన రవికుమార్ వెంటనే తెలుగుదేశం పార్టీకి రాజీనామా చేసి.. వైసీపీలో చేరాడు. టీడీపీకి రాజీనామా చేసిన రవికుమార్ నేరుగా సమీప గ్రామంలో ప్రచారం నిర్వహిస్తున్న వైఎస్సార్‌ కాంగ్రెస్‌ పార్టీ అభ్యర్థి ఇక్బాల్‌‌ను కలిశారు. ఆయన సమక్షంలో వైసీపీలో చేరాడు.నందమూరి బాలకృష్ణ వైఖరిపై సొంతపార్టీ కార్యకర్తలే అసహనం వ్యక్తం చేస్తున్నారు. ఇటీవల ఆయన ఓ వీడియో జర్నలిస్టుపై వీరంగం చేసి వార్తల్లో ప్రముఖంగా నిలిచిన విషయం తెలిసిందే. ‘ప్రాణాలు తీస్తా..’ అంటూ అతడిపై ఇంతెత్తున లేచిన బాలయ్య.. అందరి ముందే దుర్భాషలాడారు. బాలకృష్ణ ప్రచారానికి వస్తుండగా.. మార్గంలో అడ్డువచ్చిన చిన్నపిల్లలను ఆయన వ్యక్తిగత భద్రతా సిబ్బంది పక్కకు లాగిపడేశారు. దీన్ని చిత్రీకరించిన మీడియా ప్రతినిధిపై ఆయన బూతు పురాణం అందుకున్నారు. కెమెరాతో చిత్రీకరించిన దృశ్యాలను తొలగించాలని చేయి చేసుకున్నారు. ఈ వీడియో సోషల్‌ మీడియాలో వైరల్‌గా మారి వివాదాస్పదం కావడంతో క్షమాపణలు కూడా చెప్పారు. గతంలోనూ పలుమార్లు అభిమానులపై దాడి చేసి బాలయ్య అభాసుపాలయ్యారు.