సినిమాల్లో కోట్ల రూపాయలు సంపాదించుకునే ఛాన్స్ ఉన్నప్పటికీ అన్నీ వదులుకుని ప్రజాసేవ కోసం పవన్‌కళ్యాణ్ ముందుకొచ్చారని అన్నారు సినీ సంగీత దర్శకుడు కోటి. పవన్ లాంటి నాయకుడు అధికారంలోకి వస్తే కచ్చితంగా ప్రజలకు మంచి చేస్తాడన్న నమ్మకం ఉందన్నారు. సామాన్యులను సైతం సైన్యంగా మార్చగలిగే సత్తా ఆయనకే ఉందని, వ్యవస్థలో మార్పుకోసం ప్రజలు పవన్‌కు ఒక్క అవకాశం ఇవ్వాలని కోరారు. తనకు చంద్రబాబు, వైఎస్సార్, మోదీ అంటే చాలా ఇష్టమని కోటి చెప్పారు. వారంతా పరిస్థితులను బట్టి సమాజానికి ఏదొకటి చేశారని, పవన్ కూడా అలాగే సమాజం కోసం ఏదైనా చేస్తాడన్న నమ్మకం తనకుందన్నారు. పవన్‌కళ్యాణ్‌ పార్టీకి ప్రజల్లో మంచి స్పందన వస్తోందన్నారు. చిరంజీవి పార్టీ పెట్టినప్పుడు కూడా ప్రజలు బాగా ఆదరించారని, అయితే ఆయన రాజకీయంగా సక్సెస్ కాలేకపోయారన్నారు. అయితే పవన్‌కు తన అన్నయ్యను మించి ప్రజల్లో ఫాలోయింగ్ ఉందని, ఆయన కచ్చితంగా రాజకీయాల్లో రాణిస్తారని ఆశాభావం వ్యక్తం చేశారు. తనకు సీబీఐ మాజీ జేడీ లక్ష్మీనారాయణ అంటే ఎంతో ఇష్టమని, అలాంటి వ్యక్తే పవన్‌తో జతకట్టారంటేనే ఆయన సత్తా ఎలాంటిదో అర్థం చేసుకోవచ్చని కోటి అన్నారు. ఒక సాధారణ పౌరుడిగా తాను పవన్‌కు సపోర్ట్ చేస్తానని చెప్పారు. ఒకవేళ పవన్‌కళ్యాణ్ తనను పిలిస్తే పార్టీ కోసం పనిచేసేందుకు ఎనీటైమ్ రెడీగా ఉంటానని కోటి అన్నారు.