హిందూపురం ఎన్నికల బరిలోకి దిగిన నందమూరి హీరో బాలయ్య ప్రచారంలో దూసుకుపోతున్నారు. ఊరురా.. గడప, గడపకు తిరుగుతూ టీడీపీని గెలిపించాలంటూ ప్రచారం చేస్తున్నారు. ఐదేళ్లలో చేసిన అభివృద్ధిని వివరిస్తూ ముందుకు సాగుతున్నారు.. మళ్లీ గెలిపిస్తే హిందపూరంను ఆదర్శ నియోజకవర్గంగా తీర్చిదిద్దుతానంటున్నారు. కార్యకర్తలతో కలిసి ప్రచారంలో పాల్గొంటున్న బాలయ్య వారిని ఉత్సాహపరుస్తున్నారు టీడీపీ కార్యకర్తలు, నందమూరి అభిమానులతో మమేకమవుతున్న బాలకృష్ణ.. మధ్య, మధ్యలో స్టెప్పులేస్తూ జోష్ నింపుతున్నారు. ఎన్నికల ప్రచారంలో భాగంగా ప్రచార రథంలో పాటలొస్తుంటే.. కార్యకర్తలు, అభిమానులతో కలిసి డ్యాన్స్ చేస్తూ ఉత్సాహపరిచారు. ఈ వీడియో సోషల్ మీడియాలో వైరల్ అవుతోంది. 2014లో హిందూపురం నుంచి పోటీ చేసిన బాలయ్య విజయం సాధించారు. రెండోసారి ఎన్నికల బరిలోకి దిగారు.. గెలుపై ధీమాతో ఉన్నారు. ఐదేళ్లలో చేసిన అభివృద్ధిని చూసి ప్రజలు మళ్లీ పట్టం కడతారన్న నమ్మకంతో ఉన్నారు. బాలయ్యపై వైసీపీ నుంచి మాజీ పోలీసు ఉన్నతాధికారి ఇక్బాల్ పోటీ చేస్తున్నారు.